«Чылдың башкызы -2015» Оксана Кравченко: ам оолдарны аңгылаары шын эвес

  - «Чылдың башкызы» профессионал мергежил конкурузунга киришкеним-биле 2015 чыл сагыжымда арткан. Мөөрейниң хоорай, республика, бүгү-российжи чадаларынга харыысалга дээш дүвүрээзин, хөлзээшкиннерим ам артымда арткан. 

 Күзүн Казань хоорайга түңнел мөөрейге дыка дүвүрээн мен. Өске байдалдарда танывазым оолдар, уруглар-биле харылзаа тып шыдавайн баар ышкаш болган мен. Чок, ындыг эвес болган. Ындыг улуг хемчээлдиг мөөрейге киржип, арга-дуржулганы солчуп, өске регионнардан эш-өөр, коллегалар-биле ужуражылга дыка хөй чаа чүүлдерни берген. Оларның чамдыктары Тываны билир, харын-даа Мөңгүн-Тайгага чораан болганы - мени кайгаткан. Республиканың ыраккы кожуунунга Кызылдың чурттакчы бүрүзү барып шыдавас болгай. Тываны шуут билбес, Россияның составында ындыг республика барын дыңнавааннар база бар болду. 

 Конкурс үезинде эш-өөрүм, төрээннеримден аңгыда, өөреникчилерим, ада-иелери мени дыка деткээн. Тиилелгени күзээн оларның сөстери мени чалгынналдырган. Дыка хөй кижилер конкурстуң онлайн-дамчыдылгазындан хайгаарап турганы өөрүнчүг. 

 Эрткен чылда Тываның өөредилге адырында чугула болуушкуннарның бирээзи – республика баштыңының саналы-биле математика башкыларының ассоциациязын тургусканы деп санаар мен. Ону мээң башкым, амгы үеде коллегам, төрээн лицеимде класс удуртукчузу Надежда Яговдик удуртуп эгелээнинге чоргаарланыр-дыр мен. Шынап-ла шупту инженер-техниктиг мергежилдерниң үндезини математика эртемнеринде, ынчангаш оолдарга ол талазы-биле шынарлыг билигни бээри чугула. 

 Математиктиг угаан-бодалдыг оолдар, уруглар гуманитарлыг угланыышкынныг: орус дыл азы литература олимпиадаларынга тергиин түңнелдерлиг болурун хайгааралым-биле бадыткап болур мен. Ындыг өөреникчилер бистиң лицейде хөй. Ынчангаш санга азы дылга шыырак деп аңгылаары, ам нептереңгей эвес деп бодаар мен.