Тываның Кол елказы декабрь 25-те Национал театрга болур

 Республиканың бүгү кожууннарындан болгаш хоорайларындан өөредилгениң тергииннери, спортчулар, аңгы-аңгы маргылдааларның болгаш конкурстарның тиилекчилери, маадырлыг чорук кылган, 7-ден 14 харлыг 650 хире уруглар, оолдар республиканың кол Елказынга чыглыр. 

 В. Көк-оол аттыг Национал хөгжүм-шии театры Чаа чылдың солун, баштак көргүзүглерин: «Австралияда угаанныг күскежик» тоолчургу шиини, хөглүг хоровод, оюннар болгаш конкурстарны белеткээн. Байырлал көргүзүүнде Тывкүрфилармонияның миниатюралар театрының аниматорлары, Күрүнениң Ойнаарактар театры, Кызыл хоорайның Культура, уран чүүл, спорт болгаш аныяктар политиказының департаментизи киржип турар. Соок-Ирей биле Харжыгаш чаңчыл езугаар уругларга чигирлиг белектерни тыпсыр.

  Тываның Баштыңының бодундан чалалга алган салым-чаяанныг уруглар Чаа чылдың байыралынга база кээр. Оларның аразында Тывада билдингир дараазында оолдар, уруглар: өөредилгениң тергииннери - Аңгырак Донгак, Чаян Тагаланов, Байкара Суургай, Сибирьниң робототехника фестивалының тиилекчизи Айбелек Хуурак, Польшага пианистерниң делегей конкурузунуң лауреады Чайзат Чечек-оол, «Синяя птица» бүгү-российжи конкурстуң тиилекчилериниң бирээзи Ай-Кыс Кыргыс, эштиринге Кызыл хоорайның чемпиону Илья Михайлов, олимпиадалар тиилекчизи Ангелина Манакова, 2015 чылда Пермь хоорайга Россияның бирги чери дээш хостуг хүреш маргылдаазында хүлер медальды чаалап алган Сайын-Белек Монгуш, Кемерово хоорайга Сибирь федералдыг округтуң бирги чери дээш ушунуң чуань-тунь маргылдаазынга мөңгүн медалды алган Дарина Оюн база бар.

  Эрткен чылын Тываның Баштыңының Елказынга 700 уруг киришкенин сагындыраал. Өөредилгеге, чогаадыкчы ажылга база спортка тергиин дирткеннерге республиканың удуртукчузу ынчан мобильдиг телефоннарны белекке берген.