Тывага ДПС-тиң стационар постуларын катап тургузары - үениң негелдези

 Тываның Баштыңы кижилерниң айыыл чок чоруун хандырары кандыг-даа эрге-чагырганың эң чугула хүлээлгези болурун айыткан. 

 Ол амы-тын, кадыкшыл, күш-ажыл, дыштанылга камгалалындан тургустунар. Ол ышкаш бойдус, техногенниг болгаш террорисчи кандыг-даа айыылдан база камгалаар херек. 

 Бо дээрге күштерни онзагайы-биле мөөңнээрин негээр айтырыглар-дыр. Амгы үеде тургустунган боттуг байдалдарда маажым чорук, ниити сөстер, хөөремиккей аажы-чаң болгаш кайганып орар туруш шуут таарышпас. Сөстүң эвээжи, ажыл-херектиң хөйү херек.

 Эргелеп-башкарылганың бүгү деңнелдериниң: эрге-чагырганың федералдыг органнарының девискээр тургузугларының, регион болгаш муниципалдыг тургузугларның тодаргай кады ажылдажылгазын хандырар ужурлуг бис. Аңаа боттарының хүлээлгезин эки билир албан-дужаалдыг харыысалгалыг кижилерни хуваай тургузары онза чугула. Ылаңгыя муниципалдыг тургузугга ол хамааржыр. Бо угланыышкынче базымнарны бисте кылган. Чамдык кожууннарда чагырга даргаларының айыыл чок чорук талазы-биле оралакчыларының албан-дужаалдарын киирген, аңаа ИХЯ органнарынга болгаш боо-чепсек ажыглаар өске-даа тургузугларга албан эрттирип чорааннарны томуйлаан. Бо чүгле бирги базым-дыр. 

 Ийиги үе-чадада айыыл чок чорук талазы-биле оралакчыларны бүгү кожууннарга томуйлаар болгаш муници­палдыг тургузугларның специалистериниң, Чаңгыс аай диспетчер албанының специалистериниң эргежок чугула тургузуун күштелдирер херек. Муниципалитеттерде ол тургузуг­ларны автоматчыттынган «Айыыл чок хоорай» комплекизи-биле хандырар, онза байдалдарның болгаш хамааты камгалалдың байдалдарында чонга чарлап дыңнадырын, хемчег алырының бүгү республикада чаңгыс аай системазының ажылын организас­таар. 

 йыыл чок чорукту хандырарының чаңгыс аай системазының бүгү кир­жикчи­лериниң кады ажылдажылгазын нормативтиг тускай актылар-биле башкарар ужурлуг. Бодумнуң оралакчым Артур Маадыр­ович Монгалга бо эрге-хоойлу ажылын организастаарын дагзып тур мен.  

 йыыл чок чоруктуң айты­рыын чугаалап тура, орук-патруль албанының стационар постуларын тударының айтырыынга доктааксап тур мен. Ак, Элегес-Аксы болгаш Бүрен-Хем бо үш контроль пунктуларын септеп кылырын дарый доозар хүлээлгелиг бис. Бо пунктулар чүгле орук-транспорттуң айыыл чок чоруун хандырар эвес, наркотиктер болгаш шынар чок арага садар орукту дуглаар, мал оорлаар үүлгедиглерни болгаш кижилерниң кайы хамаанчок аай-дедир көжерин болдурбазын хандырар. Террористиг айыыл тыптып турар үеде бо чүүлдер онза чугула. 

 Стационар постуларга чүгле полицейжилерниң эвес, профилактиканың болгаш хоойлу-дүрүм камгалалының хөй-ниити күштерин, эки тура улусчу дружиналарны база аңаа мөөңнээр сорулгалыг бис.