Шолбан Кара-оол: Тываның бир эмнелге албан черинге бюджет акша-хөреңгизин оорлаан чорук – бужар үүлгедиг-дир

Аппарат хуралынга Тываның Баштыңы Шолбан Кара-оол, Тываның бир эмнелге албан черинге бюджет акша-хөреңгизин оорлаан чорук – бужар үүлгедиг-дир деп сойгалаан.

  Онза хөй хемчээлдиг акаш-хөреңгини оорлааны дээш, бир эмнелег албан чериниң албан дужаалдыг кижилери кирген организастыг бөлүктүң киржикчилерин эрткен неделяда тудуп хоругдаан. Эмнелге албан черинге аңгы-аңгы албан-дужаалдар ээлеп турган чеди кижи составтыг организастаттынган бөлүк 2013 чылдың январь 1-ден 2015 чылдың март 31-ге чедир күш-ажыл төлевирин санаарының талазы-биле даңзыга ажылдакчыларның ажыл төлевириниң түңнериниң дугайында меге медээни киирип турганнар. Албан черинге оларның чедирген когаралы 22 миллион рубль ажа берген. 

 «Улуг-Хемниң төп кожуун эмнелгезинге болган үүлгедигни интернет дамчыштыр билип алдым. Бюджет акшазын мелегей болгаш улуг тура-биле оорлааннар-дыр. Кымның-даа көрбээни, кымның-даа эскербээни азы эскерер күзел чок болганы бужар үүлгедиг-дир. Оор чорукту кым кылыр болдур, ол эрте-даа бол, орай-даа бол, хоойлу мурнунга харыылаар апаар дээрзин билир херек». 

 Республиканың шупту бюджет албан черлеринде саң-хөө чорудуун шыңгыы контрольга алырын регионнуң удуртукчузу негээн.