Альберт Кувезинге «Тыва Республиканың Улустуң артизи» атты тывыскан

 Алдар-аттыг рок-хөгжүмчү, «Ят-Ха» бөлүктүң лидери, Radio-3 BBC билдингир делегей премиязының Россияда чүгле чаңгыс эдилекчизи Альберт Кувезинге «Тыва Республиканың Улустуң артизи» атты хүндүлүг атты тыпсырын Тываның Баштыңы Шолбан Кара-оол бодунуң чарлыы-биле чарлаан. Республиканың Баштыңы ол шиитпирни хөгжүмчүнүң 50 харлаан юбилейинге тураскааткан концертте дыңнаткан. Ол хүннү Альберт Кувезин улуг концерти болгаш элээн каш культурлуг хемчеглер: мастер-класстар, «төгерик столдар» база Бурятия, Якутия, Москва, Красноярск край, Великобританиядан келген эштери-биле анаа-ла ужуражып, демдеглээн. 

 Юбилярга шаңналды тыпсып тура, Шолбан Кара-оол Свердловск хоорайга студент чылдарындан сактыышкынны кылган. «Свердловскиниң рок-клубтарын чаалап, оларның культуразын сиңирип алыр дээш келген Алик-биле ынчан ужурашкан мен. Урфин Джюс, Наутилус Помпилиус, Чайф, Настя, Агата Кристи – ол свердловчу бөлүктерниң дыка хөй хөгжүмчүлери ол сонуургак тыва оолду сактырлар» - деп чугаалаан. 

 Юбилярга видеобайыр чедириишкинин Москвадан Гарик Сукачев биле Сергей Галанин дамчыткан. 

 Великобританиядан үн-экспериментатору Ник Хоббс, «Табык» фестивалының уран чүүл удуртукчузу (Якутия), Россияга дыка хөй тыва хөгжүмчүлерни ажыткан Карл Сергучев биле чурукчу Ольга Рахлеева; «Ханхалаев» (Константин Ханхалаев) галареязы-биле 10 ажыг чыл кады ажылдап, Россияда болгаш даштыкыда российжи Азияның культуразын («Ят-Ха» бөлүүнүң хөгжүм үделгези-биле база) таныштырып чоруур алдарлыг бурят чурукчу Зорикто Доржиев; Тывадан үнген, Шагаан-Арыг чурттуг Александр Медведевтиң удуртканы Абакандан бөлүк; Альберт Кувезинниң жюрини солуттунмайн даргалааны "Курага" фестивальдың администратору Татьяна Павина; чаңгыс чер чурттуглары - республиканың уран чүүл школазының бичии хөгжүмчүлерин удурткан Валерий Ондар, Саин Монгуш, Орлан Салчак, Татьяна Крыцина, "Red City”,«Малышок», «Алаш», «Хартыга» олар юбилярге байырны ол хүн чедиргеннер. 

 Байырлалдың эң-не солун кезээ «Ят-Ха» бөлүүнүң күүселдези болган. 

 Юбилярның адрезинге чылыг сөстер хөй болган. Парламент даргазының оралакчызы Ирина Самойленко бодунуң коллегазы, Дээди Хуралдың депутады Альберт Кувезинниң соңгукчуларының мурнунга онза харыысалгалыын демдеглээн. Кызыл хоорайның баштыңы Дина Оюн юбилярның хөглүг баштаан, чугаакырын онзалаан. Кызыл хоорай мэриниң оралакчызы Нина Потапова хоорайның социал-экономиктиг хөгжүлдезинге киирген үлүг хуузу дээш медальды тывыскан. ТР-ниң ОШАЧКИ эргелелиниң начальнигиниң хүлээлгезин күүседип турар Андрей Светышев Тываның ИХЯ-зының адындан ОШАЧКИ-ниң хөй-ниити инспектору хөрек демдээн тывыскан.