Тываның Баштыңының шиитпири-биле С. Бочкаревка улуг деткимче көргүскен

 Каа-Хем кожууннуң Дерзиг-Аксындан «Чаңгыс суур – чаңгыс бүдүрүлге» төлевилели-биле бут кырында быжыг туруп келген сайгарлыкчы Семен Максимович Бочкарев тудуг ыяжы-биле чурттаар бажыңнар, чунар-бажың, чайгы серилер, мал кажаалары тудары-биле билдингир кижи. Бо удаада ол ыяш болбаазырадылга ажыл-агыйын чедиишкинниг удуртуп турар сайгарлыкчы Бочкарев С.М-ге «БЕЛМАШ ОМТЛ-97» маркалыг автомашинаны «Чаңгыс суур – чаңгыс бүдүрүлге» губернатор төлевилелиниң чедиишкинниг боттандырылгазы-биле хүлээдип, ооң күш-ажылчы хей-адын улам бедиткен.

  «Тайга-даскыл черге чоруунга тааржыр улуг күчүлүг автомашина - ыяш материалдарын сөөртүрүнге дыка ажыктыг эт. Ам ооң-биле хала чок ажылдап эгелээринге белен мен» - деп, сайгарлыкчы өөрүшкүзүн үлешкен. 

 Тываның Баштыңы улуг, бедик машинаның хөрээнге олурупкаш, ону хөделдирип, ажылдап эгелээринге белен-дир деп, сеткил ханыышкын-биле үнелээн. Тываның Чазааның мурнундан сайгарлыкчыга 1, 5 млн. рубль өртектиг ол улуг этти «Тывага бүдүрген» деп ылгавыр демдекти улам сайзырадыры дээш бергени – төлевилелдиң чедиишкининиң херечизи.