Тываның Баштыңы чурттакчы чонга тайга тооруу чыырынга дуза чогу дээш муниципалдарны чемелээн

 «Рынокта улуг хереглелде тайга тооруун чыырынга чогуур байдалдарны тургузары-биле холбашкан ажылды мөөңнээрин муниципалдыг эрге-чагырга тургузуп шыдаваанын миннир апаар» - деп Тываның Баштыңы понедельникте селектор хуралда чугаалаан. 

  Бо чылын тайга тооруунуң өртээ эки болганындан садып алыкчылар чурттакчы чондан ону хөйү-биле садып алган. Регионнуң удуртукчузу «Чаңгыс суур – чаңгыс бүдүрүлге» губернатор төлевилели-биле тус черниң чыыкчыларынга садып алыкчыларже дорт үнер арганы тургузуп, тайга тооруу хүлээп алыр төпчүттүнген сайгарлыкчы төлевилелди ажылдап кылырын шагда-ла сүмелээн турган.  

 "Чурттакчылыг черлерниң удуртукчулары, муниципалдыг тургузуглар чагыргаларының даргалары боттарының чаңгыс чер чурттугларынга бүгү талазы-биле деткимчени көргүзер турган: тоорук чыып тайгаже үнер кижилерге таптыг, чогуур деңнелде айыыл чок чорукту, таарымчалыг байдалдарны организастаар талазы-биле. Ол ажылды чогуур деңнелге кым-даа удуртуп шыдаваан. Ооң түңнелинде аскан кижилер дилээри-биле камгалакчылар чаңгыс эвес удаа үнүүшкүннерни кылган. Бурган авыралында, шуптузу онча менди болган. Ындыг болзажок Тожу кожуунда бир кижини дилээри ам-даа уламчылавышаан. Күрүне кижи дээш улуг сагыш човаашкынны чорудуп турар. Ынчангаш күрүне структуралары кижиге, бодунуң хамаатызынга, бодунуң чаңгыс чер чуртуунга дээш ажылдарны чорудар ужурлуг. Хамаатыны камгалаары-биле шупту чүвени кылыр ужурлуг силер. Хөй-ниитиниң негелделерин сайгарар херек. Ынаар кичээнгейни угландырыңар" - деп Шолбан Кара-оол чугаалаан.