Якоб Нанеташвили: Тываның Баштыңының чуртта чүнүң-даа үндезини – чоннуң чаңгыс деминде дээнинге чөпшээрежир мен

 Кызыл хоорайда колбаса бүдүрүкчүзү, билдингир сайгарлыкчы, 50 харлыг Якоб Александрович Нанеташвили Тывада 26 чыл чурттап турар. Ооң бүдүрүлгезиниң барааны 2012 чылда «Сибирьниң тулган барааннары болгаш ачы-дузалары» регионнар аразының конкурузунуң лаураеды, 2013 чылда «Россияның тулган 100 барааннары» бүгү-российжи конкурстуң лауреады, «Шынарның тергиини» демдектиң эдилекчизи. 2015 чылда Тыва Республиканың Көдээ ажыл-агый болгаш аъш-чем яамызы Өөрүп четтириишкин бижиин Я. Нанеташвилиге тывыскан.

 Чоннуң чаңгыс деминиң хүнүнүң бүдүүзүнде Якоб Нанеташвилиге Тыва Республиканың Баштыңының Хүндүлел бижиин байырлыг байдалга тывыскан. Бодунуң бодалдары-биле ол үлешкен: 

  - Шыны херек, мону черле манавадым (каттырар). Кижиниң күш-ажылын үнелеп демдеглээрге, дыка онза-дыр. Улуу-биле четтирдим! Чоннуң чаңгыс деминиң бүдүүзүнде Хүндүлел бижикти алыры ийи дакпыр өөрүнчүг-дүр. Тываның Баштыңының чуртта чүнүң-даа үндезини – чоннуң чаңгыс деминде дээнинге бүрүнү-биле каттыжар мен. 

 Ада-чуртуң Улуг дайынының соонда кандыг турган ийик? Шупту демнежип, каттышкаш, эгин кожа ажылдап тургаш, чуртту тургузуп эккелген. Шолбан Валерьевичиниң «күш-ажыл кижини каастаар» дээнин кезээде деткиир мен. Ачам чок өзүп келген болгаш, авамга дузалажыр дээш, 10 харлыымдан эгелеп ажылдап эгелээн мен. Бистиң совхозка аңгы-аңгы нация чоннар ажылдап турган. Эп-демниң, найыралдың хамаарылгаларның үлегеринге өскен мен. Өг-бүледен дыка хөй чүүлдер хамааржыр. Ада-ие ажы-төлүн улуг кижилерни, эш-өөрүн, аңгы-аңгы нацияның чонун хүндүлээр кылдыр кижизидер. Чүгле кижизидер эвес, а бодунуң үлегер-чижээн көргүзер ужурлуг.