Чеди-Хөл кожуунда тараачын-фермер ажыл-агыйының удуртукчузу Чечена Оюнга «ТР-ниң көдээ ажыл-агыйының алдарлыг ажылдакчызы» атты тывыскан

 Тываның Баштыңы Шолбан Кара-оолдуң чарлыы-биле Чеди-Хөл кожуунда тараачын-фермер ажыл-агыйының удуртукчузу Чечена Оюнга «ТР-ниң көдээ ажыл-агыйының алдарлыг ажылдакчызы» атты тывыскан.

 Тараачын-фермер ажыл-агыйының удуртукчузу «Чаңгыс суур – чаңгыс бүдүрүлге» губернатор төлевилелиниң идепкейлиг киржикчизи, муң малдыг малчын, 2012 чылдың сентябрьдан бээр ажыл-агый биче хемчээлдиг сүт заводун тудуп турар. Ында чалаң сүттү, сливки, сметана, кефир, творог, тыва быштакты бүдүрүп турар. Чер черлерде ажыттынып турар ындыг мини-заводтар муң малдыг малчыннарга дыка херек. Сүдүн ол-ла черинге болбаазыраткаш, чоок кавы суурлар, Хову-Аксы, Кызылче чедирип, саарары кедилиг.

  Көдээ ажыл-агый адырынга чедиишкинниг ажыл-чорудулгазы-биле күрүне шаңналынга төлептиг болганын республиканың баштыңы Шолбан Кара-оол демдеглээн. Ооң күш-ажылынга бедик үнелелди бергени дээш Чечена Оюн регионнуң баштыңынга өөрүп четтиргенин илереткен.