Октябрь 21-де «Комсомольская правда» радионуң «Эртенги шоу» программазы дыңнакчылар аразынга Тываның Баштыңының шаңналын ойнадыр

 Тываның Баштыңы Шолбан Кара-оол Москвада «Комсомольская правда» үндүрүлге бажыңынга чораан. Ону чиңгине директор Владимир Сунгоркин биле ооң оралакчызы Роман Карманов уткуп алгаш, ажыл-агыйын таныштырып, Тыва Республиканың ажыл-амыдыралын улуг сонуургал-биле айтырганнар. Регионнуң баштыңы ном үндүрер черниң чаа номнарын болгаш альбомнарын сонуургап танышкан, ылаңгыя «Ада-чурттуң Улуг дайынының кол документилери» деп чыынды онза үнелиг ном-дур дээрзин демдеглээн.

  КП-ниң удуртулгазы-биле чылыг ужуражылга соонда, республиканың Баштыңы Шолбан Кара-оол «Комсомольская правда» радиога интервьюну берген, ону октябрь 23-те Москваныы-биле 16.05 шакта эфирге дыңнап болур. «Комсомольская правда» радиога солун дамчыдылга болду. Кайгамчыктыг Тывавыстың, ооң кижилериниң дугайында сонуургадып таныштырдым» - деп республиканың баштыңы соцчеткилерде бодунуң бижидип алыкчылары-биле бодалын үлешкен. 

 kp.ru сайтыга материалды чара парлаар. 

 Средада, октябрь 21-де, «Комсомольская правда» радионуң «Эртенги шоу» программаның 8.45 шакта болур дорт эфиринге республиканың баштыңының шаңналын база ойнадыр. «Азияның төвүнде республика-биле таныш база биске аалдап келиксээн кижиге ол таваржыр болза, дыка-ла онза ийик! Чалааны база Тывага ханы сонуургалы дээш, «Комсомольская правдага» четтирдим» - деп бодунуң блогунда Шолбан Кара-оол бижээш, «Комсомольская правданың» чиңгине директору Владимир Николаевич Сунгоркинниң чалалгазын хүндүткел-биле хүлээп алганын демдеглээн.

  «Россияның регионнарының, ооң аразында Тыва Республиканың курлавырын, бүгү чаражын болгаш сонуурганчыг чүүлүн ажыдарынга сонуургалдыг, бодунуң ажыл-херээниң профессионалы болгаш РФ-тиң улуг дээн МИЧ-териниң бирээзиниң удуртукчузу-биле ужуражып чугаалажыры онза-дыр» - деп регионнуң удуртукчузу бижээн.

 Тываның Баштыңы Шолбан Кара-оол Москва хоорайда федералдыг яамыларда ажыл-агыйжы ужуражылгаларны эрттирип, элээн каш хонукта сургакчылап турарын сагындыраал. Дмитрий Медведевтиң удуртулгазы-биле «Чаңгыс демниг Россия» партияның чыыжынга, база ол ышкаш Күрүне Чөвүлелиниң Президиумунуң чуртка балык ажыл-агыйының адырын хөгжүдер айтырыглар талазы-биле хуралынга ол киришкен.