РФ-тиң рыногун ада-чурттуң шынарлыг балык продукциязы-биле хандырарын сайгарган күрүне чөвүлелиниң Президиум хуралынга Тываның Баштыңы киржир
19.10.2015
Понедельникте РФ-тиң Президентизи Владимир Путин Күрүне чөвүлелиниң президиумунга балык адырын хөгжүдер айтырыглар талазы-биле хуралды эрттирер. Хуралга администрация болгаш чазактың экономиктиг блогунуң, федералдыг албаннарның болгаш ведомстволарның удуртукчулары, Федерация субъектилериниң баштыңнары болгаш балык ажыл-агый бүдүрүлгелериниң удуртукчулары киржир. Кремльдиң сайтызында айыттынганы-биле, иштики рынокту ада-чурттуң шынарлыг балык продукциязы-биле хандырарының, чурттуң балык ажыл-агыйын комплекстиг хөгжүдериниң, балык үлетпүр хереглелинге суднолар тудуушкунунуң база балык болбаазырадырынга инфраструктура төлевилелдериниң айтырыгларын хуралга сайгарып чугаалажыр.
Тываның Баштыңы Күрүне чөвүлелиниң Президиум хуралынга киржир. Бо чылдың июльда РФ-тиң Президентизиниң дузалакчызы Игорь Левитинның удуртулгазы-биле эрткен «Россия Федерациязында балык ажыл-агый комплекизин хөгжүдериниң дугайында» айтырыгга Күрүне чөвүлелиниң президиумунуң белеткелиниң талазы-биле ажылчын бөлүктүң хуралынга Шолбан Кара-оол киришкенин сагындыраал. Ажылчын бөлүктүң төлээлери боттарының илеткелдеринде сугнуң биологтуг курлавырларын тударынга квота үлелгезиниң, балык тывыш флодун модернизастаарының, ада-чурттуң судно тудуун катап тургузарының, аквакультура адырында хоойлужудулганы сайзырадырының айтырыгларын болгаш адырда административтиг шаптараазыннарны сайгарып чугаалашкан. Тываның Баштыңы Шолбан Кара-оол ол ынчан Соңгу чүктүң, Сибирьниң болгаш Ыраккы Чөөн чүктүң эвээш санныг үндезин чурттакчыларынга балык тударының аңгы чурумун киирерин саналдаан. Ооң бодалы-биле, чаңчылчаан биологтуг курлавырларны, ылаңгыя балыкты, тударынга квота бээрде аңгы чиигелделиг чурумну тургузары чугула.
Тываның эвээш санныг чоннарының төлээлеринге балык ажыл-агыйы амыдыраарының овур-хевири база ажыл-ижиниң чарылбас бир кезээ болуп турар. Үнелиг балыктарлыг далайдан дыка ыракта чурттап турар эвээш санныг чоннарның төлээлеринге аңгы арга-хевир херек.
Тывада чаңчылчаан ажыл-ишти Мөңгүн-Тайга, Тере-Хөл, Тожу, Эрзин кожууннарның 11 суурларында эвээш санныг үндезин чурттакчылар чорудуп турар. Балык тывыштыг 3 участок тодараттынган. Эвээш санныг үндезин чурттакчыларга чыл санында сугнуң биокурлавырларын 5 тоннадан хөй эвести тударынга квотаны берип турар.
Россияның субъектилеринге Россия Федерациязының иштики сугларынга сонуургактар болгаш спортчу балыктаашкынга балык тывыжының участоктарын быжыглаарынга конкурсту эрттирери чугула деп Шолбан Кара-оол санап турар.
Возврат к списку
|