Тываның ийи школазы Россияның 500 тергиин школаларының санынче кирген
13.10.2015
Россияның тергиин 500 школаларының даңзызынче Кызылдың Совет Эвилелиниң Маадыры Н. Макаренко аттыг 15 дугаар лицейи биле Кызылдың 5 дугаар гимназиязы кирген. РФ-тиң Өөредилге болгаш эртем яамызының кады чорудуу-биле «Учительская газета» база «Россия бөгүн» МИА-ның «Социал навигатор» информастыг деткимчези-биле Москваның үзүктел чок математиктиг өөредилге төвүнүң белеткээни Россияның тергиин 500 школаларының чыл санының даңзызынче олар кирген. Ооң түңнелдерин октябрь 12-де делегей чергелиг «Россия бөгүн» деп информация төвүнге «2014-2015 чылдың Россияның тергиин школалары» деп парлалга конференциязынга РФ-тиң Чазааның Даргазының оралакчызы Ольга Голодецтиң, РФ-тиң өөредилге болгаш эртем сайыды Дмитрий Ливановтуң киржилгези-биле чарлаан.
РФ-тиң Өөредилге болгаш эртем яамызының демдеглээни-биле, өске регионнар-биле деңнээрге, Тывада эки ажылдыг 2 школа бары амдыызында бедик эвес көргүзүг. Ынчалза-даа 2013 чылда Россияның 500 тергиин школаларының аразынче республиканың бир школазы – республиканың лицей-интернады, 2014 чылда республиканың кайы-даа школалары рейтингиже кирбээнин барымдаалаар болза, бо чылгы түңнелдерни чедиишкинниг деп санап болур.
Өске көргүзүг аайы-биле, республиканың тергиин школаларын дооскан тоску классчыларның саны-биле, Тыва Бүгү-российжи рейтингиде сески черде. Кызылдың 15 дугаар лицейинге болгаш 5 дугаар гимназиязынга хамаарыштыр 7,9 хуу тоску классчылар онаажып турар. Россияның 500 тергиин школаларының тоску классчыларының саны-биле рейтингиде тергииннерниң бөлүүнде Москва — (32,7 хуу), Калининград облазында — (14,7 хуу), Хакас Республикада — (14,0 хуу), Тамбов облазында — (13,6 хуу), Липецк облазында — (8,7 хуу), Калмык Республикада — (8,2 хуу), Чуваш Республикада — (8,1 хуу), Киров облазында — (7,4 хуу), Ярославль облазында — (7,2 хуу).
Возврат к списку
|