Аныяктар шуулганы: сайгарлыкчы чорук талазы-биле эксперттер төлевилелдер камгалалының үезинде тиилекчилерни тодараткан

 «Евразияның интеллектуалдыг алдыны» шуулганның үшкү хүнүнде «Экономика болгаш сайгарлыкчы чорук: бизнестиң өзээ» шөлчүгештиң ажылы чымыштыг болган. Эгелеп чоруур сайгарлыкчылар болгаш бизнести эгелээр деп планнаан бөлүк аныяктар харылзааны сайзырадып, садыглаашкынны шапкынчыдарының билиглеринге хамаарышкан бизнес-оюнга киришкеннер. 

  Менеджерлер Ассоциациязының ажыл-агыйжы аныяктар ниитилежилгезиниң баштаар чериниң даргазы, «Student of Business Administration» өөредилге программазының тургузукчузу болгаш удуртукчузу Владислав Шипиловтуң удуртулгазы-биле оолдар бот-боттары-биле чугаалажып билириниң, ажыл-агыйжы харылзааны тударының, бодунуң бараанын болгаш ачы-дузазын дүрген садарын шиңгээткеннер. 

 Бизнес-шиитпирлерни хүлээриниң болгаш дээштиг бизнес-эштежилгелерни тургузарының талазы-биле мастер-классты тренер Анна Шолина эрттирген. Дуржулгалыг коллегаларының чугааны чогуур уунче угландырып бээри, хостуг байдал, чамдык эгениичел кижилерниң солун эгелээшкиннерин боттары идип үндүргеш, ону боттандырарының оруктарын тывар арганы тургускан. 

  Ийиги бөлүкте, амгы үеде ажылын шуудадып эгелээн сайгарлыкчылар бодунуң бизнезин хөгжүдери-биле күрүне деткимчезинче кордап, «Сен – сайгарлыкчы сен» программа-биле база, төлевилелдерин камгалаан. Россия аныяктарының сайгарлыкчы чоруунга деткимче көргүзер төптүң директору Артем Давыдовка баштаткан эксперттер жюризи төлевилел бүрүзүн чүгле дыңнап эвес, а сайгарылга үезинде чедер-четпестерин айтып, төлевилел боттандырыышкының үезинде болур хире частырыглардан канчаар чайлаарынга сүмелерни берген. Арга-дуржулгалыг бизнесменнерниң талазындан бизнес чорудуунга шыңгыы үнелелди бергени аныяк сайгарлыкчыларны ундаратпаан, харын-даа оларны дыңнап, деткип, чамдыктарда шүгүмчүлээни дээш, өөрүп четтириишкинни болдурган. 

 57 төлевилелдерни сайгаргаш, 23 төлевилелге орукту берген. А чамдык төлевилелдер жюриниң эки үнелелин алган. Чижээ, Алдынай Ондарның «Эдиски-фотосалонга» көжүп чоруур фотостудияны ажыдар дээн төлевилели бүгү талазы-биле эксперттерге таарышкан. Аныяк сайгарлыкчының планында – байырлалдарның фотоальбомун болгаш номнар үндүрер талазы-биле ачы-дуза чедирилгези бар. Уруглар төвүнүң ээзи Ай-Куш Саттың төлевилели социал болгаш кончуг чугула, ол бодунуң ажыл-херээн эгелээрде 600 муң ажыг рубль акша-хөреңгини киириштиргеш, школа назыны четпээн уругларга баштайгы бөлүктү республика найысылалында ажыткан. Сайгарлыкчының планы - бизнезин ам-даа калбартыр.

 Сайгарлыкчы чорук талазы-биле шөлчүгештиң ажылының түңнелинде эксперттер Тываның Баштыңының 100 муң рубль грантызын Алдынай Ондар («Чагыг езугаар фотономнар үндүрери»), Ай-Куш Сат ( «Аистенок» урглар төвү) оларга тыпсыр деп шиитпирлээн.

 Москвага эртер «Аныяк сайгарлыкчы-2015» конкурстуң түңнел кезээнге Тываны 3 аныяк сайгарлыкчы төлээлээр: Айыжы Иргит («TuvaLiteFood» национал дүрген чемненилге чери), Андрей Ондар («Мокка кофе»), Сайзанак Саая (садыг «I lova Korea@). 

 Аймир Чаж-оол («Өлчей-кежик» банкет залы - полуфабрикаттар бүдүрери), Шеңне Саая («Пөстен хээлээн, базыткан, хол-биле кылган суй-белектер кылыры»), Адыгжы Монгуш («Теплица ажыл-агыйы»), Айыжы Иргит («TuvaLiteFood») олар Моолга стажировкалаар сертификаттарны алганнар. 

 А Мурнуу Көреяга өөренири-биле Мерген Ооржак («Быжыг, экологтуг арыг, таарымчалыг болгаш «өртээ-шынары» негелдеге дүгжүп турар тудуг материалдарын бүдүрери), Андрей Ондар («Мокка кофе» - кофейня четкилерин сайзырадыры), Анастасия Монгуш («Кижиниң сайзырал школазы»), Сайзанак Саая (садыг «I lova Korea@), Григорий Ульзутуев («Веб Медиа Ресурс»), Шораан Чынгылап («Энергия бээр үндезиннерни тывары, биочылыг болгаш биогаз бүдүрүлгези») аъттаныптарлар.