Тываның найысылалында ОГН-ниң «Кызыл-Курагино» археологтуг-географтыг экспедициязы: скифтерниң чажыды болгаш эртинези» делгелге ажыттынган

 Тывада Туризмниң информастыг төвүнде фотоделгелге Орус Географтыг ниитилелдиң эң улуг төлевилели «Кызыл-Курагино» археологтуг-географтыг экспедицияга тураскааткан. Делегейде улуг хемчээлдиг археологтуг казыышкыннарның киржикчилериниң фотогалереяда ажылдары кичээнгейни хаара тудар. Фото-ажылдардан археологтарның ажыл хүнүнүң болгаш дыштанылгазының, «Хааннар шынаазы» болгаш «Ермак» хову лагерьлериниң тыпканы кайгамчыктыг үнелиг чүүлдериниң, Тываның болгаш Красноярск крайның онзагай бойдус чурумалының дугайында танжып, сонуургап болур. 

 5 чылдың дургузунда чоруткан археологтуг шинчилелдерге Россияның хоорайларындан болгаш даштыкы чурттардан 3 муң ажыг студентилер болгаш волонтерлар киришкен. Оларны бо хүнге дээр чаңгыс сорулга каттыштырган – Кызыл-Курагино демир-оруунуң эртер черинге хайгаарал-камгалалдың археологтуг хемчеглерин чорудары. Келир үеде транспорт судалының эртер черин дургаар, төөгүге арттырары-биле эртемге даянып, бүрүнү-биле шинчилээр база камгалаар ужурлуг, төөгүнүң болгаш археологияның 50 ажыг тураскаалдары чыдар. 

 2014 чылда Орус географтыг ниитилелдиң «Россияның бойдус болгаш культура өнчү-салгалы» номинацияга премияны «Кызыл-Курагино» археологтуг-географтыг экспедициязы чаалап алган. ОГН-ниң президентизи Сергей Шойгунуң саналы-биле, чурттуң байлак национал өнчү-салгалын өөрениринге болгаш кадагалаарынга улуг үлүг-хуузун киирген шинчилекчилерни, бирги орук изекчилерин, төөгүчүлерни алдаржыдар езу-чаңчылды катап эгелээр сорулгалыг 2014 чылдың декабрь 9-та Москвага эртирген байырлал үезинде премияны тывыскан. 

 Кызылда фотоделгелге ОГН-ниң делегей чергелиг төлевилелинге тураскааткан хемчеглерниң уламчызы болур. Бо чылдың июнь 24-те Москва метрополитениниң «Выставочная» метро станциязының ийиги каъдынга «Кызыл-Курагино» археологтуг-географтыг экспедиция: скифтерниң чажыды болгаш эртинези» экспозиция делгелгези ук хемчегниң байырлыг эгези кылдыр санаттынар. 

  Тывада Туризмниң Информастыг төвүнде фоточуруктарның делгелгези ийи ай иштинде чонга бараан болур.