Кызылдың Президентиниң кадет училищезиниң сургуулдары маадыр хоорай Севастопольже аъттаныпкан!

 Кызылдың Президентиниң кадет училищезиниң шупту 130 сургуулдары бирги улдуңда маадыр хоорай Севастопольже аъттаныптар! Ооң дугайында Тываның Баштыңы Шолбан Кара-оол Вконтактыда арынында бижээн: 

 «Эки медээни дыңнадыры-биле далажыйн! Президентиниң кадет училищезинче эрткен чылын боолгаш бо чылын кирген оолдар шупту бирги улдуңну Севастопольга эрттирер! РФ-тиң камгалал сайыды Сергей Кужугетович Шойгунуң шиитпири езугаар тускай шериг самолет-биле, оолдар бүрүзүнүң, эр кижиниң чедип барыксаары, маадыр-хоорайже ужуп үнүптерлер. Россияның Кара-далай флодунуң Качада ужар гарнизонунга, далай чадаг шерииниң шериг кезээнге, Нахимов училищезинге солун практиктиг кичээлдерни ап, экскурсиялаарлар. Бистиң оолдарывыс Севастопольга эрес-дидим, быжыг тура-соруктуң болгаш шериг чоргааралдың езулуг үлегер-чижээн көөрлер! Президентиниң кадет училищези бедик билиглиг, угаан-медерел болгаш сагыш-сеткил-биле сайзыраңгай кижилерни белеткээринге бүзүрээр мен. Ынаар, бирги ээлчегде, социал камгалалы кошкак өг-бүлелерден болгаш өскүстерден көдээ оолдар кирип алзын дээш туржур мен». 

 Чаа өөредилге чылының эгезинде Тываның Баштыңы Шолбан Кара-оол биле Кызылдың Президентиниң кадет училищезиниң директору Андрей Киселев ажыл-агыйжы ужуражылганы эрттирген. Училищеже сургуулдарның чаа чыылдазының түңнелдерин, Президентиниң кадет училищезиниң немелде объектилерниң тудуг чорудуун сайгарганнар.