Тывада Кызылдан үнген микроавтобустуң киржилгези-биле Красноярск чоогунга болган орук озал-ондаанга холбаштыр изиг шугумну ажыткан

 Тываның Кадык камгалал яамызында «изиг шугумнуң» дугаары – 8 (394-22) 2-32-55 

 Кызыл-Красноярск маршрут-биле үнген «Истана» маркалыг микроавтобус-биле болган орук озал-ондааның дугайында дыңнадыг дарый келген. Красноярск крайның Зеледеево суурнуң чоогунга эртенгиниң сес шак үезинде авария болган. Баш бурунгаар билдингени болза, автобустуң чолаачызы башкарып шыдавайн барганындан аңдарылган. Озал-ондактың уржуундан кемдеп-бертирген 13 кижини Красноярск крайның клиниктиг база Дүрген эмчи дузазының эмнелгелеринде чыттырган. Бир кижи өлген. 

 Тываның Баштыңы Шолбан Кара-оол социал адырның яамыларынга озал-ондакка таварышкан Тыва Республиканың чурттакчыларының кадыының байдалын тодарадырын, херек болза чугула организастыг болгаш эмчи дузазын көргүзерин, Красноярск хоорайның эмнелгелеринге чедирерин дааскан. 

 Тываның катастрофалар медициназының бригадазы озал-ондак болган черге четкен. «Истана» микроавтобус хуу рейсти кылып турган. Транспортту 28 харлыг аныяк кижи мунуп чораан. Авария техниктиг чылдагаан-биле болган чадавас, чүге дизе автомашинаның ийи дугую кышкы, а артканнары аңгы-аңгы бүдүрүкчүлернии болган. Чолаачының чугаазы-биле алырга, машинаны дүрген эвес башкарып чораан.