Тывада Хөөмей фестивалының үшкү хүнү: аншлаг, аншлаг!

 “Азия төвүнде – хөөмей” I бүгү-делегей чергелиг фестивальдың мөөрей программазы Тыва культура төвүнге болгаш Улусчу чогаадылга бажыңынга аншлаг-биле уламчылаан. Евгений Сарыглар, Аян-оол Сам, Болот Байрышев, Бады-Доржу Ондар, Хосоо дээн ышкаш ат-сураглыг хөөмейжилер хөөмей-сыгыдын бараалгаткан. Ачыты Салчак, Эрес Ховалыг, Артыш Монгуш дээн өске-даа шыырак аныяктар, Өвүр кожуундан Сайын-Херел Кончукпан ышкаш эгелеп чоруур күүседикчилер база бар. 

 Тыва культура төвүнүң камерлиг күүселдеге таарыштыр кылган оран-савазы аңгы-аңгы хар-назынныг, сөөк-язылыг күүседикчилерниң далаш чокка күүсеткен чаңгыстың чаңчылчаан сыгыт-хөөмейин дыңнаарынга дыка таарымчалыг. Киржикчилерниң композицияларынга болгаш күүселдезиниң хевирлеринге кызыгаарлаашкын чок. Кол негелде – микрофон болгаш электрохөгжүмнер чокка хөөмей-сыгыдын күүседир. 

 Испан Гилям Солерн Кортанның күүселдезин көрүкчүлер чылыы-биле хүлээп алган. Хөөмейниң билдингир хевирлери: хөөмей, сыгыт, каргыраа, борбаңнадыр, эзеңгилээрни бедик деңнелге күүсеткенин көрүкчүлер магадаан. Ол амгы үениң, электроннуг хөгжүмү-биле шагда-ла чоок. Чаа дилээшкиннер үезинде Интернет четкизинден 2011 чылда бир дугаар хөөмейни дыңнааш, ол чүү деп чүвел дээрзин билбээн. «Обертоннуг ыры» деп дилээрге, кезээде бирги одуругда «тыва боостаа ырызы» деп чүүл үнер. Шак ынчаар тыва хөөмей-биле чоок таныш апарган. Үн бижидилгелерин дыңнап тургаш, хөөмейни шиңгээдип, мөөрейде бараалгатканы деңнелге четкенин ол чугаалаан. 

 Улусчу чогаадылга бажыңынга база изиг болган. Хөөмейниң чижилгезинде киржип турарларның күштүг тура-соруунуң хей-аъды көрүкчүлерни улам сорук киирген. Ол хүн гитара, баян, саксофон, акустиктиг гитара, барабаннар, хөгжүм фонограммазының үделгези-биле ужуккан сыгыт-хөөмейниң үнү чаңгыланган. 

 Фестивальдың үшкү хүнүнде хөөмейниң узун, берге болгаш эң берге марафону көрүкчүлерге тускай белек болган.