Тываның Баштыңы Кызыл хоорай биле Кызыл кожууннуң эрге-чагыргаларын автооруктарда орук-транспорт озал-ондактары дээш чемелээн
11.08.2015
Тываның Баштыңы Шолбан Кара-оол оруктарның байдалын болгаш орукка айыыл чок чорукту хандырар дугайында чугааны көдүрген. Озал-ондактарның бир чылдагааны – кол орукче кирип турар боттары тывылган бичии оруктар деп, ол айыткан. Шак ындыг чүүлдү Кызыл хоорай биле Кызыл кожуунну тудуштурган Магистральная кудумчузундан көрүп болур. Эрткен дыштаныр хонуктарда Магистральная кудумчузунга ВАЗ-2107 биле Газель автомашиналар озал-ондакка таварышкан.
«Хоорайда авариялар силерниң найысылалды долгандыр орук хөгжүлдезиниң талазы-биле комплекстиг планны тургузар хөңнүңер чогундан база дээштиг ажыл-чорудулга кылып шыдавазыңардан болуп турар. Хоорайжыларның Кызылдың болгаш Каа-Хем суурнуң кудумчуларынга айыыл чок чоруун хандырар дээш чурумну киириңер азы боттарыңарның оралакчыларыңар-биле халажылгаже чоруңар» - деп, Кызыл хоорай биле Кызыл кожууннуң чагыргаларын чемелээн.
Регионнуң баштыңы чидиг айтырыгны сайгарып, чогуур хемчегни алырын олардан негээн. Ол оруктарның кыдыын чаагайжыдып, арыглаарынче кичээнгейни база угландырган: «Чедип алган чедиишкиннерден бурунгаарлап, ону көвүдедир ужурлуг бис, а куду бадар эвес. Бүзүреткен участоктар дээш харыысалганы удуртукчулар боттарыңар харыылаар силер».
Кызыл хоорай биле Кызыл кожууннуң эрге-чагыргазы-биле регионнуң баштыңы аңгы ужурашкаш, найысылалдың комплектиг тудуунуң, Каа-Хем хөмүр-даш уургайындан М-54 федералдыг орукка чедир асфальтылыг шывыглыг орук айтырыгларын база чугаалашкан.
Возврат к списку
|