"Орленок" уругларның дыштанылга лагери ийиги сезонну ажыткан

 Чайгы лагерьниң дирекциязы хыналда-хайгаарал органнарының илереткен четпестерин шуптузун чайлаткан: оран-саваларны, девискээрни дезинфекциялаан, саргыга энтомологтуг шинчилгени чоруткан, кадрлар составын чаарткан, ажылдакчылар шупту эмчи хыналдазын эрткен. Хыналданың төнчү түңнелдеринге даянгаш, Таңдының район суду уругларның дыштанылга албан чериниң ажылын июль 23-тен эгелеп катап эгелээр шиитпирни үндүрген. Ийиги ээлчег июль 24-ден ажыттынган, лагерьде 160 уруг дыштанып турар.

  Лагерьниң бирги ээлчээн уругларның ишти аарааны-биле июнь 25-тен хагган турганын сагындыраал. Четпестерни чайладыр кылдыр лагерьни 30 хонукта суд шиитпири-биле хагган. Республиканың чазаанда «Орленок» лагеринде байдалды хыналдага алыр оперативтиг штабты тургускан. Ам моон соңгаар ындыг таварылгаларны уруглар албан черлеринге болдурбазы-биле, республиканың хереглекчилер эвилелинге хамааржыр дыштанылга лагерин, күрүне өнчүзүнче дамчыдар ажылды чорудуп турар.