Тывада Чөөн-Хемчик кожууннуң Чадаана хоорайда 6 муң олуттуг чаа стадионну байырлыг езу-биле ажыткан

 Наадым, Даа кожууннуң үндезилеттингениң 250 чылы база дириг хөгжүм болгаш чүдүлгениң «Үстүү-Хүрээ» фестивалының байырлалында Чадаана хоорайда чаа стадионну бөгүн ажыткан. 

 Үстүү-Хүрээ фестивалын деткип, чогуур деңнелдиг инфраструктураны тургузары-биле Тываның Баштыңы Шолбан Кара-оол кожуун чагыргазынга база Аныяктар херектери болгаш спорт яамызынга Чөөн-Хемчик кожууннуң төвүнде стадионну эде кылыр дугайында даалганы берген. 2014 чылдан эгелеп ону эде тутканының түңнелинде, Чадаананың стадиону 6000 олуттуг, кылымал шывыглыг, футбол шөлдүг, чаа спортчу объект апарган. 

 Стадион тудуунга республика бюджединден 6 млн. рубльди шилчидип, муниципалдыг бюджет акша-хөреңгизин база киириштирген. Деткикчилерниң акша-хөреңгизи-биле кылымал шывыгны саткан. «Чадаананың ОСТУ» КУБ, «Суугу» биле «Экспресс-тудуг КХН» тудуг организациялары ажылдарны чоруткан. Ниитизи-биле чадаанажылар стадион тудуунга идепкейлиг киржип, ачы-дуза марафонун эрттирип, деткикчилерни хаара тудуп, тус черниң 50 кижизи тудугну кылган. 

 Чөөн-Хемчик кожууннуң юбилейлиг чылында Чадаана хоорай ийи улуг спортчу объектилиг – күш-культура-спорт комплекстиг база чаа стадионнуг болган. Кожууннуң чурттакчылары спорттуң аңгы-аңгы хевирлеринге: футболдан хүреш, волейбол, баскетболга чедир ойнаар черлиг болганнар. Ам чүгле кожуун маргылдааларын эрттирер эвес, а республиканың улуг маргылдааларын спортчу шөлдеринге хүлээп алыр арга бар.

  «Ам кожууннуң эрге-чагыргазы болгаш республиканың спортчу ведомствозунуң мурнунда сорулга - өзек тренер составты тургузуп, спортчу кичээлдерниң шынарлыг программазын белеткеп, бедик деңнелдиң кожуун командазын тургузуп, амыдыралдың кадык овур-хевирин хевирлээр дээш, кожууннуң оолдар, уругларынга спортчу эң-не эки шынарларны дадыктырар арганы бээр. Спортта-даа, чуртталгада-даа эге байдалдарны тургузары – ол эң-не чугула» - деп, Тываның Баштыңы Шолбан Кара-оол демдеглээн. 

 Июль 23-те чаа стадионга Даа кожууннуң 250 чылынга болгаш «Наадым-2015»-ке тураскааткан аныяк мөгелер аразынга республиканың тыва хүреш маргылдаазы эртер.