Тывада Наадым хүннеринде Интернет четкизинге дорт дамчыдылганы организастаар

 Тыва Республиканың Чазааның албан езузунуң сайтызындан (gov.tuva.ru) база «Тывасвязьинформ» ААН-ның сайтызындан (www.tuva.ru) чоннуң Наадым байырлалының кол байырлал хемчеглерин ол-ла шак үеде дорт дамчыдылгадан көрүп болур. 

  Тыва Республиканың Харылзаа болгаш информатизация яамызы биле «Тывасвязьинформ» ААН, «Чеди-Хаан» КХН, Информастыг технологиялар төвү, «Новый век» биле «Тува 24» телекомпаниялар июль 23-те Чадаана хоорайда чаа стадион ажыдыышкынын, Аныяктар хүрежин дорт дамчыдар планныглар. Дамчыдылга 14.00 шакта эгелээр. Кежээкиниң 20.00 шакта «Үстүү-Хүрээ» дириг хөгжүм болгаш чүдүлгениң бүгү делегей фестивалының ажыдыышкынын дамчыдар. 

 Июль 24-те тыва хүрештиң аарыкчылары онлайн чурум-биле Наадымның кол спортчу болуушкуну – тыва хүрештиң республика маргылдаазын көөр аргалыг. Маргылдааны спортчу тайылбырлакчылар тайылбырлаар. Дамчыдылга 13.00 шакта эгелээр.

 «Тывасвязьинформ» бүдүрүлгези дорт видео-дамчыдылганы дамчыдарынга аңгы каналды аңгылаан, чаа IP телевидениеге (Internet Protocol Television) кирер аргалыг республиканың хоорай, суурларының чурттакчылары Интернет четкизизинден Наадымның хемчеглерин көрүп болур. 

 Интернет четкизинге Тывада улуг хемчеглерни дамчыдар арга-дуржулганы бир дугаар эвес эрттирип турары ол, бо удаада найысылалдан дөрт шак чоруур черде муниципалдыг тургузугдан дамчыдылганы бир дугаар эрттирер. Ол төлевилелди боттандырары-биле белеткелди байырлал хемчеглери эгелээр мурнунда-ла эгелээн. 

  Бо чылын июль 23-ден 25-ке чедир «Наадым-2015» байырлалы-биле Даа кожууннуң 250 чылы биле «Үстүү-Хүрээ» фестивалы чергелештир эртерин сагындыраал.