Тываның Баштыңы арга-арыг өрттери хыпкан девискээрлерни кырындан хынап турар

  Бөгүн республика баштыңы Шолбан Кара-оол арга-арыг өрттери хыпкан девискээрлерни кырындан өртчү десантчылар-биле хынап турар. Ооң түңнелинде кол участоктарга күштерни болгаш арга-хевирлерни таарыштыр үлээр ажыл-чорудулганы кылыр.

  Ужуп үнериниң мурнунда ол Тываның арга-арыг авиахайгаарал болгаш Арга-арыг күрүне комитединиң ажылдакчылары-биле база Омскыдан Тывада дузалажып келген федералдыг курлавырның десантчылары-биле ужурашкан. Ажылдың ниити байдалдарын, хеп-сын болгаш дериг-херекселдер-биле чепсеглээшкинни чугаалашкан. Шолбан Кара-оол өртчүлерге дузалажып келгени дээш четтиргенин илереткеш, от халавы-биле демиселде боттарын камнаарын чагаан. 

 Июль 22-ниң эртенги медээзи-биле, республиканың арга-арыг фондузунуң ниити шөлү 6004 га черлеринде 19 арга-арыг өрттери хып турар. Хып турар 16 өрттүң ниити шөлү 3419,5 га, оларның 2027,5 газы арга-арыгда. 2584,5 га шөлдүг 3 арга-арыг өрттүн бо шакта өжүрген.

 Тыва Республикада арга-арыг өрттерин өжүреринге болгаш чок кылырынга 304 ажылдакчы: Тываның авиа баазазының авиа-өрт албанындан - 58, арга-арыг ажыл-агыйындан - 10, эки турачы арга-арыг өртчүлеринден - 32, федералдыг курлавырдан - 168 кижи хаара туттунган. 21 санныг техника өртчүлерниң ажыглалында.