Ценгел тываларының наадымынга киржири-биле Моолче тыва делегация аъттаныпкан

 Өөредилге болгаш эртем сайыды Каадыр-оол Бичелдейге удурткан чогаадыкчы коллективтер төлээлери, спортчулар кирген делегация ценгел тываларының наадымынга киржири-биле июль 13-те аъттаныпкан. Тываның Баштыңы Шолбан Кара-оолдуң Күрүне Чөвүлелиниң президиумунуң ажылчын бөлүүнүң база Россияның энергетика сайыды Александр Новакка энергетика ажыл-агыйын хөгжүдериниң айтырыглары-биле холбашкан хуралдарга киржир планнаттынган ажыл-агыйжы сургакчылаашкыны-биле Ценгелдиң Наадымы капсырлажы берген. Ынчангаш Тываның Баштыңы Наадымның организаторларынга болгаш киржикчилеринге бодунуң байыр чедириишкинин дамчыткан.

   Июль 15-те Баян-Өлгий аймактың Ценгел сумузунга Моолда чурттап турар тываларның Наадымы эгелээр. Ону моол-тыва кады ажылдажылга ниитилелиниң деткимчези-биле моол тываларының «Эв нэдгел», «Авам» ниитилелдериниң, «Чинагийн Галсан» фондунуң, Моолдуң «Улуг одаг» тыва студент ниитилежилгезиниң база Тываның даштыкы-биле экономиктиг харылзаа агентилели организастап эрттирип турар. Байырлалда Россияның Тывадан келир аалчылардан аңгыда, Моолдуң өске аймактарындан тываларның этниктиг ниитилелдеринден төлээлерни манап турар.

    Албан езузунуң байырлыг кезээнден аңгыда, тываларның ынак оюннары – хүреш, ча-биле кара адыры, аът чарыжы, национал уран чүүлдүң мастерлериниң концерти, национал тыва хеп көрүлдези болгаш өске-даа культурлуг хемчеглер байырлалды каастаар. Оон аңгыда делегацияларның төлээлери ча адарының мөөрейинге киржирин Наадымның эрттирикчилери планнаан. Көшкүн чоннарның дайынчы уран чүүлдү-биле холбап бурунгу езу-чаңчылдарны хүндүлүг аалчыларга таныштырар. Июль 16-да Моол биле Ценгел тываларының Наадымы маргылдааның тиилекчилерин шаңнап-мактаан база түңнел концерт-биле төнер.