Тываның Баштыңы уруглар садтарының тудуунче күрүне-хуу эштежилгени киириштирериниң аргаларын көөрүн дааскан

Тываның Баштыңы Шолбан Кара-оол Тудуг яамызы биле Инвестициялар хаара тудар агентилелге уруглар садтарының тудуунче күрүне-хуу эштежилгени киириштирериниң аргаларын көөрүн дааскан. Россияның өске регионнарында шак ындыг схема чедиишкинниг ажылдап турары.. Төлевилелди боттандырарын чорудар күзелдиг партнерлар бар. Тываның Юстиция херектериниң талазы-биле яамыга КХЭ-ни боттандырарының нормативтиг-эрге-хоойлу баазазын анализтеп, ажылдап кылырын дааскан. Алызында уруглар садтары тудар шөлдерниң, ооң турар черин, инфраструктурага кожарының техниктиг аргаларын ажылдап кылырын Тудуг яамызынга онааган. Бүгү ажылдарны узамдыгыышкын чокка кылырын чугаалаан.

Шолбан Кара-оол Кызыл хоорайның солагай талакы дачаларның уругларынга чаа уруглар садын тударынга шөлдү белеткээрин даасканын, Тудуг яамызы биле Кызыл хоорай мэриязы дугуржулгазының күүселдезиниң дугайында сагындырган.

Күрүне-хуу эштежилгеде бизнес бодунуң акша-хөреңгизи-биле уруглар садтарын тудуп каарга, күрүне ону садып алыр.

«Сөөлгү ийи чылда республикада уруглар садтарын тудар талазы-биле байдал экижээн. Күрүне-хуу эштежилге быжыгып, эки талаже угланыышкынны бээр» - деп Шолбан Кара-оол демдеглээн.

2013-2014 чылдарда чаа уруглар садтарын тудуп, эде кылып, капиталдыг септелгелерни чорутканындан, база чартык хүн хүнзээр бөлүктерни болгаш хуу садиктерни ажыглалга кииргенинден, назы четпээн уруглар албан черлеринге 6615 олутту киирген.

Уруглар садтарынче 3-ден 7 хар аразында уругларның оочуру 2015 чылдың эгезинде 9979 уруг турганындан 5165 чедир кызырылган. Сөөлгү ийи чылда назы четпээн уруглар албан черлеринче ол назы-харның уругларын хаара тудары 49,0 турганындан 69,5 хуу четкен.

2015 чылдың дургузунда 4740 олутту уруглар садтарынче дужаар. Республикада 5 чаа садикти ажыглалга киирери планнаттынган.