РФ-тиң Спорт яамызынга Тыва эштир бассейн биле спортчу төп тудуун доозарының субсидия акшазын камгалап алган

Тываның Баштыңы Шолбан Кара-оол биле РФ-тиң Спорт яамызы ийи улуг спортчу объектилер – Ак-Довурак хоорайда эштир бассейн биле Каа-Хем кожууннуң төвү Сарыг-Сеп суурда спортчу комплекстиң тудуун 2015 чылда доозарынга субсидияның арткан кезиин бээр дугайында дугуржулгага атты салганнар. Федералдыг деткимчени алыры-биле республика ол ийи тудугга бодунуң акша-хөреңгизинден 74 млн. рубльди киириштирген. Аңаа уткуй РФ бодунуң бюджединден ол ийи төлевилелге 200 млн. рубльдиң акшаландыырышкынын тускайлаан, ооң 60 млн.-ни бо чылын кирип келген.

Тудуг-монтаж ажылдарының бадылаттынган графиги езугаар объектилерни бо күзүн ажыглалга киирер ужурлуг. Ак-Довурактың бассейни төгерик хевирлиг кылдыр туттунган Тывада ийи дугаар эштир чер болур. Ооң ажыглалы-биле республика 4 улуг бассейнниг апаар болгаш тус-тузунда олар бир ээлчегде-ле 32-ден эвээш эвес кижини эрттирер аргалыг.

Дооразы 18, узуну 36 метр ишкир залдыг Сарыг-Септиң спорт комплекзи база онзагай. Ында спорттуң ойнаар хевирлерин сайзырадырындан аңгыда, Тывада эң нептереңгей ча адарының спортунга кышкы үеде белеткенип болур. Ча адыкчыларын белеткээриниң кол баазазы болур, бир ээлчегде-ле хары угда 43 хире спортчуну хүлээп аптар ындыг улуг спортчу залдар республикада чүгле найысылал Кызылда база кожуун төвү Бай-Хаакта бар. Россияның олимпийжи чыынды командазының кежигүннери, делегей чергелиг мастерлер Елена Достай биле Михаил Оюн олар тус черниң спорт школазындан үнгеннер.