16.06.2015
Социал угланыышкынныг коммерцияга хамаарышпас организацияларга республика бюджединден субсидияны бээриниң дугайында дүрүмнү Тываның Чазаа бадылаан. Коммерцияга хамаарышпас организацияларның төлевилелдерин шилиир талазы-биле конкурс комиссиязының шиитпиринге даянгаш, субсидияны бээриниң чурумун, байдалын, критерийлерин ол документ тодарадып турар.
Федералдыг хоойлужудулга езугаар бүрүткеттинген, Тываның девискээринде социал угланыышкынныг ажыл-чорудулгалыг КХО конкурс шилилгезинге киржип болур. Хууда кижилер, коммерциялыг организациялар, күрүне корпорациялары болгаш компаниялар, политиктиг партиялар, шажын организациялары, профэвилелдер, күрүне болгаш муниципалдыг албан черлери, юридиктиг эвес хөй-ниити каттыжыышкыннары, конкурс комиссиязының төлээлери кирип турар коммерцияга хамаарышпас организациялар, тускайжыттынган организациялар субсидия алыкчыларының даңзызынче кирбес.
«Бо дээрге социал угланыышкынныг ажыл-чорудулгалыг КХО-ларны республиканың эрге-чагыргаларының деткиириниң бирги арга-дуржулгазы-дыр» - деп күш-ажыл болгаш социал политика сайыды Людмила Тас-оол дыңнаткан.
2015 чылдың республика бюджединде ол сорулгага 1,6 млн. рубль көрдүнген. Конкурстуң негелдези-биле тодараттынган организацияга бээр акша-хөреңгиниң хемчээли ниити көрдүнген акшаландырыышкынның 15 хуузундан ашпас ужурлуг.
Социал өскүс чоруктуң профилактиказы, ие-чаштарны деткиири, назылап кырааннарның амыдырал-чуртталгазының байдалын экижидери, инвалидтерниң болгаш оларның өг-бүлезиниң социал адаптациязы, немелде өөредилгени хөгжүдери, эртем-техниктиг болгаш уран чогаадылга, массалыг спорт, чурт-шинчилел болгаш бойдус камгалалының талазы-биле ажыл-чорудулгалыг коммерцияга хамаарышпас организацияларга субсидияны бээри көрдүнген.
Оон аңгыда өөредилге, чырыдыышкын, эртем, культура, уран чүүл, кадык камгалал адырында, амыдыралдың кадык овур-хевирин суртаалдаар, хамаатыларның сагыш-сеткил байдалын экижидер, патриотчу кижизидилге, эмчи болгаш социал реабилитация, наркотиктерге алысканнарны уштур дээш ажылдап турарларга деткимчени көргүзер.
Конкурстуң түңнели-биле КХО-нуң рейтинтизин тургузар. Тиилекчи болганнар төлевилелин боттандырарынга саң-хөө деткимчезин алыр. Арткан саң-хөөнү чедиштир үлээр. ТР-ниң Күш-ажыл яамызының дыңнатканы-биле алырга, конкурсту бо чоокку үеде чарлаар. Бо хүнде Тывада бар 143 КХО-ларны конкурска шупту киржир кылдыр чалаан.
Конкурс комиссиязын республиканың вице-премьери А.М. Монгал удуртур, ынаар яамының специалистери, Тывада уругнуң эргелерин камгалаар бүрүн эргелиг төлээ, МИЧ-тиң, бизнестиң, Хөй-ниити палатазының, муниципалдыг тургузугларның төлээлери кирген.