Кара - Хөлдүң эмчизинге улуг шаңнал

Кайгамчыктыг кижилер чырык чер кырында чурттап чоруур. Фаина Допур-ооловна Дагба Бай-Тайга кожууннуң Кара-Хөл участок эмнелгезинде дежурный эмчи сестразы болуп ажылдап чоруур.Эрткен чылын Бай-Тайганың Кара-Хөлге өрттен когараан өртчүлерниң мөчү-сөөгүн дилежиринге база дириг арткан оолдарны камгалаар ажылга эрес-дидим киришкени дээш Кара-Хөл эмчи бригадазының кежигүнү, эмчи сестразы Фаина Допур-ооловна Дагбага «Онза айыыл-халаптар уржуктарын чайладырынга дидим чоруу дээш» хөрек демдээн тывыскан. Шынзылгага Россияның иштики херектер органнарының Генерал-майору В.Н. Светильский ат салган.
   Фаина Допур-ооловна бергелерге торулбас, ажы-төлүн чааскаан бут кырынга тургузуп алган кайгамчык буянныг ава, аас-кежиктиг кырган-ава. Уруу Долаана эмчи, Долумазы бо чылын көдээ ажыл-агый техникумунче өөренир күзелдиг. Дагбаларның өг-бүлезинге, уруг-дарыынга, ажы-төлүнге, уйнуктарынга ак орукту, аас-кежикти күзеп каалыңар!

Ортун-оол Салчак, Кара-Хөл сумузу