Мөңгүн - Тайгага болган көшкеге дириг арткан 17 харлыг Антон Салчак эштерин дилээр ажылдарда киржип турар

      Шак - ла мындыг медээни кожууннуң төп эмнелгезиниң кол эмчизи Дугар - оол Хертек дыңнаткан. Ооң чугаазы -биле алырга, Антоннуң кадыының байдалы чүгээр: бертик - бежел, үжээн черлер чок. Бо хүн, март 4 - те, ол камгалакчылар - биле кады эштериниң чыдар черлерин айтып бербишаан, оларны дилээр ажылдарга киржи берген. Мөңгүн - Тайганың полиция ажылдакчыларының дыңнатканы - биле, шупту оолдар спортка хандыкшылдыг, ийизи  мөгелер болгаш  бежи кикбоксерлар болуп турарлар. Март 20 - де Нижний Тагил хоорайга болуп эртер маргылдааларга киржиринге белеткенип турганнар. Оон аңгыда илерээни болза, бо оолдар ооң мурнунда база  Ак - Баштыг дааның кырынче үнгеш, хей - аът туктарын азар чаңчылдыг турганнар.

      Эрткен улуг - хүнде, март 3 - те, Ак - Баштыгның шыпшык бажынга четкеш, бадып турганы кокпа - биле эвес, а ийни куду чуңгуулап бадыпканнар. 17 харлыг Антон Салчак хаялардан туттунупкаш дириг арткан. Чоогунда малчын Биче - оол Адар - оолдуң аалынга боду кылаштап чедип келген. Антон кикбоксингиге Европаның чемпиону. Ооң - биле кады чораан эштери 4 кижи - 11 класстың өөреникчилери, 1 кижи - 9 - ку классчы, 1 өөреникчи 7 классчы база бирээзи 18 харлыг турган дээрзин сагындырып каалы. Көшкеге таварышкан оолдарның саны шуптузу 7 кижи.

      Бо хүн Москва хоорайдан Тывага чедип келгеш, республиканың  Баштыңы  Шолбан Кара - оол Мөңгүн - Тайгаже улаштыр чоруптар күзелин илереткен.