Башкыларга күрүне шаңналдары

Өөредилгениң чаа аргаларын, амгы технологияларны болгаш төлевилелдерни өөредилге-кижизидилге ажылынга чедиишкинниг шиңгээдип ап турар башкыларның аразынга конкурстарның тиилекчилери башкыларга, республиканың улус өөредилгезинге улуг үлүг-хуузун киирген башкыларга Тыва Республиканың Баштыңының Хүндүлел бижиин, Тыва Республиканың күрүне шаңналдарын, Россия Федерациязының шаңналдарын тыпсырының байырлыг езулалы дүүн, октябрь 3-те, Чазак Бажыңынга болган. Ону өөредилге болгаш эртем сайыды Каадыр-оол Бичелдей ажыткаш, байырлыг езулалга келген башкыларга байыр чедиргеш, Тыва Республиканың Чазааның Даргазының оралакчызы Анатолий Дамба-Хууракка сөстү берген. 

Чазак Даргазының оралакчызы башкыларга байыр чедирип, башкы дээрге кижи бүрүзүнүң чуртталгазында кол кижи-дир деп оларның ажылын бедии-биле үнелээн, Тыва Республиканың Баштыңы Шолбан Кара-оолдуң, ТР-ниң ДХ-ның даргазы К.Давааның башкыларга байыр чедириишкинин номчуп дамчыткан.

Тыва Республиканың Баштыңының Хүндүлел бижии-биле Кызылдың №5 гимназиязының директорунуң өөредилге-кижизидилге талазы-биле оралакчызы Наталья Юрьевна Глебова, Мөңгүн-Тайга кожууннуң Мугур-Аксы ортумак школазының физика башкызы Макар Арындуевич Ондар шаңнаткан.

«Тыва Республиканың өөредилгезиниң алдарлыг ажылдакчызы» атты Чадаананың № 3 школазының химия башкызы Раиса Бадыевна Кууларга тывыскан.

Россия биле Тываның демнежилгезиниң 100 чылынга тураскааткан юбилейлиг медальды Тываның улус өөредилгезиниң хоочуну Александра Максимовна Чаш-оолга, Шагаан-Арыгның №1 ортумак школазының директорунуң класстан дашкаар кижизидилге талазы-биле оралакчызы Людмила Сергеевна Спиринага, республиканың улус өөредилгезиниң хоочуну Бичей Монгушевна Мангырга тывыскан.

Россия Федерациязының Өөредилге болгаш эртем яамызының дужаалы-биле Кызылдың № 9 гимназиязының тыва дыл болгаш литература башкызы Ульяна Александровна Стал-оол, Кызылдың №5 гимназиязының эге класстар башкызы Эликмаа Эрес-ооловна Лопсан, Тыва Республиканың күрүне лицейиниң математика башкызы Наталья Степановна Германова, Тыва Республиканың лицей-интернадының география башкызы Ирина Алексеевна Кучумова, Чеди-Хөл кожууннуң Ак-Тал ортумак школазының математика болгаш информатика башкызы Артем Анай-оолович Донгак оларга тус-тузунда 200 муң рубль түңнүг акша шаңналдарын федералдыг бюджеттен тывыскан.

Өөредилгениң чаа аргаларын, амгы технологияларны болгаш төлевилелдерни өөредилге-кижизидилге ажылынга чедиишкинниг шиңгээдип ап база тарадып турар башкыларның аразынга конкурстарның тиилекчилери башкыларга Тыва Республиканың Баштыңы-Чазааның Даргазының акша шаңналдарын база тывыскан. Кызылдың № 9 гимназияның география башкызы  Нелли Владимировна Монгуш, Тээли ортумак школазының англи дыл башкызы Ай-Мерген Александрович Күжүгет, Тоора-Хем ортумак школазының эге класстар башкызы Рита Владимировна Шожул дээш, чогаадыкчы езу-биле ажылдап чоруур өске-даа башкылар шаңнатканнар.

Шаңгыр-оол Монгуш.

"Шын" солун