Аныяк-өскенге патриотчу кижизидилге

Массалыг-камгалал ажылдарының айы

«2011-2015 чылдарда Россия Федерациязының хамаатыларының патриотчу кижизидилгези» күрүне программазының боттандырылгазы-биле массалыг-камгалал болгаш спортчу шимчээшкинде аныяктарның шериг-патриотчу кижизидилгезин база хамааты идепкейин бедидер сорулга-биле Тыва Республикада республика чергелиг хемчеглерниң айы январь 23-тен февраль 23-ке чедир эртер.

Бо хемчегни ТР-ниң Өөредилге болгаш эртем яамызы база Тываның профессионал өөредилге адырында кижизидилге сайзырадырының эртем-методиктиг төвү Ада-чурттуң камгалакчызының хүнүнге тураскаадып эрттирип турар.

Республика чергелиг массалыг-камгалал ажылдарының айында өөредилге албан черлеринде эрес-дидим чорук кичээлдерин, класс шактары, семинарлар, угаан сайзыралының оюннары, чуруктар мөөрейлери база библиотекаларда тематиктиг кежээлер болгаш делгелгелер эртип турар. Ол ышкаш өөредилге албан черлеринге байырлыг чыскаалдар, митингилер болгаш Ада-чурттуң Улуг дайынының, дайынчы болуушкуннарның киржикчилери-биле, тылдың ажыл-ишчилери-биле ужуражылгаларны эрттирип, хоочуннарга ачы-дуза чедирилгезин база көргүзүп турар.

Шеригжиткен эстафеталар, хаактаашкын, спортчу маргылдаалар, талазы-биле республика чергелиг маргылдаа болгаш кадык амыдыралды суртаалдаан оон-даа өске хемчеглер планда кирип турар. Оон аңгыда республиканың өөреникчилериниң, эге болгаш ортумак өөредилге албан черлериниң студентилеринге «Мээң Ада-чуртум» деп патриотчу ырлар мөөрейи ышкаш чогаадыкчы мөөрейлер, «Солдатка белек» деп чуруктар, фотоальбомнар, чогаадыглар, «Бис сеңээ бүзүрээр бис, солдат» деп республика чергелиг патриотчу акциялар эрттирери планда көрдүнген.

Массалыг-камгалал ажылдарының айының түңнелдери-биле мөөрейлерниң, маргылдааларның болгаш акцияларның тиилекчилеринге ТР-ниң Өөредилге болгаш эртем яамызы дипломнарны, хүндүлел бижиктерни болгаш өртектиг белектерни тыпсыр.

Валерия КОНГАР.

"Шын" №21 2013 чылдың февраль 19