Главная
Пресс-служба
Медээлер

Тывада ТШО хоочуннары социал керээни ажыглап сайгарлыкчылап болур

20.11.2026 14:40

«Өг-бүле» национал төлевилел-биле хууда ажыл-херээн ажыдарынга күрүне деткимчезин тускай шериг операциязының 26 хоочуну база алыр. «Ада-чурт камгалакчылары» күрүне фондузунуң салбырынга эрткен бизнес-планнар сайгарар комиссияның ээлчеглиг хуралында ындыг шиитпир хүлээп алдынган. Ниитизи-биле 27 төлевилелди сайгарып көрген.

Кызыл хоорайдан, Кызыл, Таңды, Каа-Хем, Улуг-Хем, Тожу, Тес-Хем, Мөңгүн-Тайга, Сүт-Хөл, Чеди-Хөл кожууннардан хоочуннар сайгарлыкчы эгелээшкиннерин таныштырган. Ыраккы муниципалдыг тургузуглардан киржикчилер боттарының бизнес-планнарын видеохарылзаа дамчыштыр камгалаан.

Төлевилелдерниң аразында техниктиг хандырылга станцияларын, автомобильдерже үнүүшкүннүг диагностиканы ажыдары, бода болгаш шээр мал азырап-өстүрери, идик-хеп даараары, аъш-чем бүдүрүлгези болгаш чедирилгезиниң ачы-дузалары бар.

Чижээ, Кызылдан 24 харлыг Олег Ортаат СТО ажыдарын планнап турар. Ол чажындан-на автомашиналарны сонуургаар, машиналар септээринге ачазының дузалакчызы чораан. Олег шериг албанын эрттирип тургаш, машиналар будуурунга немелде арга-дуржулганы алган. Ам авазының гаражынга мастерская ажыдар бодалдыг. Ынчангаш ынаар чылыгны киирип алган.

Алдын-Херел Серен-оол мобильдиг автодиагностика угланыышкынын сайзырадыр планныг. Республиканың кайыын-даа чурттакчылары, ол ышкаш орукка машиназы үрели берген чолаачылар оон дузаны дилеп болур.

Кызыл кожуундан тускай шериг операциязының хоочуну Аймир Дивии база бодунуң ажыл-херээн ажыдар. Аар кемдээшкинден бир будун чидирген соонда, ол шериг албанындан халашкан. Чанып келгеш, ол сайгарлыкчы чорукту шилип алган. Социал керээ акша-хөреңгизин ажыглап, пицца, шаурма болгаш өске-даа чемнер белеткээр болгаш чедирер цехти ажыдар деп планнап алган. Бо талазы-биле ооң арга-дуржулгазы бар.

«Боттуң ажыл-херээн ажыдары – социал керээниң эң нептереңгей угланыышкыннарының бирээзи-дир. Тускай шериг операциязының хоочуннарынга бо хемчег чүгле акша-хөреңги деткимчези-биле эвес, а профессионал мергежилин сайзырадып, бот шимченирин чедип алырынга болгаш өг-бүлезинге доктаамал орулганы хандырарынга дузалаар. Тускай шериг операциязының хоочуннары болгаш оларның өг-бүле кежигүннери өг-бүлезиниң кижи санынга ортумак орулгазын барымдаалавайн, сайгарлыкчы чорукту эгелээринге социал керээни чарып болуру эптиг» - деп, Тыва Республиканың күш-ажыл болгаш социал политика сайыды Сылдыс Ондар демдеглээн.

Социал керээ-биле бодунуң ажыл-херээн эгелеп алырынга 350 муң рубль чедир түңге эгидилге чок күрүне деткимчезин бээри көрдүнген. Программаны ажылдадып эгелээн үеден бээр тускай шериг операциязының 1000 ажыг хоочуннары сайгарлыкчы ажылды сайзырадырынга социал керээ акша-хөреңгизин алганнар.

Программага киржир дизе, «Ада-чурт камгалакчылары» күрүне фондузунуң салбыры-биле харылзажыр, аңаа олар комиссияның сайгарылгазынга көөр документилерни болгаш бизнес-планны белеткээринге дузаны көргүзерлер.