Главная
Пресс-служба
Медээлер

2026 чылда Тывага ЭКО дузазы-биле 27 чаштар төрүттүнген

20.11.2026 12:32

Тывада национал төлевилелдер күүселдези-биле, үре-садында бергедээшкиннерлиг өг-бүлелерге деткимчени көргүзүп турар. Чижээ, чылда он-он чаштар ЭКО процедуразының түңнелинде төрүттүнген. Ооң мурнунда ЭКО төлевирлиг турган болза, ам ону эмчиниң сүмелээни езугаар ыяап медицина камгаладылгазының полизи-биле ап болур. «Өг-бүле» национал төлевилел ындыг арганы берген.

Регионалдыг Кадык камгалал яамызының дыңнатканы болза, ЭКО-нуң ачызында 2026 чылдың эгезинден бээр республикада 27 чаштар төрүттүнген. Ниитизи-биле 191 өг-бүлени процедураже чоруткан, а 36 херээжен ЭКО соонда иштелип, бүрүткеттинген.

Республиканың Перинаталдыг төвүнүң специалистери ЭКО-нуң чедиишкинниг болуру ашак-кадайның назы-харындан, божувас болганының чылдагаанындан, үрениң шынарындан дээш, дыка хөй чылдагааннардан хамааржыр деп демдеглээн. Статистика-биле алырга, 35 хар четпээн херээженнер эң эки түңнелдерни берип турар.

Ыяап эмчи камгаладылгазы-биле ЭКО-ну эртери халас. Специалистен консультацияны алыр дизе, Перинаталдыг төптүң консультация-диагностика салбырының регистратуразынче 6-01-90 дугаарлыг телефон-биле долгажып болур.

Үре-сады кадыкшылынга диспансеризация шинчилгези иштелиринге, кадыкшылдың байдалынга багай салдар чедирип болур чылдагааннарны тодарадырынга улуг рольдуг. Комплекстиг шинчилгелер иштелиринге болгаш эмнээшкинни эгелээринге шаптыктыг чажыт аарыгларны үезинде илередип болур.

Эмчи шинчилелдериниң программазын аарыг кижиниң назы-харынга болгаш байдалынга хамаарыштыр тускай тургузар. Ыяап эмчи камгаладылгалыг, 18-тен 49 харга чедир назылыг, эр база херээжен улус быжыглаттынган поликлиниказынга үре-сады кадыкшылын хынадып болур. Баштайгы эмчи хыналдазының соонда, анализтер болгаш процедураларның сөөлгү даңзызы билдинер.

«Узун болгаш идепкейлиг назын» национал төлевилел езугаар, Тываның чурттакчыларының үре-сады кадыкшылынга хыналдаларны халас кылып турар. Ындыг хыналдаларның кол сорулгазы – эр-херээжен аарыгларны эрте чадазында илередип, божуп-көвүдээр аргаларны камгалап кадагалаары.