Главная
Пресс-служба
Медээлер

Тывада культура бажыңнары туткан «Сорунза» губернатор төлевилели көдээниң чурттакчыларын демнештирген

20.11.2026 11:29

«Сорунза» губернатор төлевилели-биле Арыг-Үзүү, Тээли, Ээрбек, Сайлыг суурларда көдээ культура бажыңнарының тудуу түңнел кезээнче киргенин Тываның Культура яамызы дыңнаткан.

Губернаторнуң эгелээшкини культура объектилериниң инфраструктуразын чаартырынга, көдээ чурттакчыларны культура-чырыдыышкын хемчеглеринге хаара тударынга, оларның культурлуг хостуг үезин организастаарының шынарын бедидеринге таарымчалыг байдалдарны тургузар. Бо чылын Владислав Ховалыг эрги тудугларны чаартпайн, оларның орнунга чаа тудугларны тударын шиитпирлээнин сагындыраал.
Библиотекалыг, 120 олуттуг көрүкчү залдыг, культура бажыңнарын чаңгыс аай төлевилел-биле тудуп турар.

Кызыл кожууннуң Ээрбек суурда культура одааның төөгүзү шагда-ла 1947 чылда суугу-одаар бичии казанактан эгелээн. 1966 чылда албан чери чаа оран-саваже көшкен турган, амгы чаа үениң оран-савазын суур чону «Сорунза» төлевилели-биле тудуп турар.

Кызыл кожуун чагыргазы тудугнуң ажылдарын таарыштыр организастаан. Тудугда чүгле Ээрбектиң культура бажыңындан эвес, а Элегес-Аксы, Черби суурлардан коллегаларын хаара туткан. Культура ажылдакчыларының бир демнии ажылдың темпизин дүргедедип, хей-аъдын улам бедиткен.

Бай-Тайга кожууннуң Тээли суурда туттунуп турар клубта одалга системазын тургузупкан. Тудугжулар эжиктерни салып, херимни тургузуп дооскан, амгы үеде брусчатка даштарын чадып турар.
Суурнуң шупту организациялары тудуг ажылдарында хаара туттунган. Чүгле эр улус эвес, херээжен улус база идепкейин көргүскен. Аңгы-аңгы организацияларның херээжен чону ээлчежип тургаш, тудугжуларга изиг чемни кылып берип, эр улусту деткип турарлар.

Тээли клувунуң директору Нелли Күдерек тудугжулар бедик көдүрлүүшкүннүг ажылдап турарын демдеглээн. Шупту организацияларның ажылдакчыларынга демниг күш-ажылы болгаш сагыш чоаашкыны дээш сеткилиниң ханызындан өөрүп четтиргенин илереткен.

«Сорунза» губернатор төлевилели 2021 чылда эгелээнин сагындыраал. Тудугну боттары тудуп үндүрери-биле бо төлевилел онзагай —республика бюджединден аңгылаан акша-хөреңгини клубтуң тудуг материалдарын, эт-севин база дериг-херекселдерин садып ап, тус черниң чурттакчылары болгаш суур чагыргалары демнежип ажылдап турар. Ындыг арга-биле республикада он алды чаа культура албан черлери туттунган.