2026 чылда «Амыдыралга инфраструктура» национал төлевилел-биле Тывада орук четкизиниң 13 участогун, ниитизи-биле 60 хире километрни чаарткан. Бо неделяда республиканың Орук-транспорт комплекизиниң яамызы эрткен чылдың баш бурунгаар түңнелдерин үндүрген.
Тываның Баштыңы Владислав Ховалыгга таныштырган отчетта, бүдүн адырда планнаттынган септелге болгаш тудуг ажылдары 95 хуу күүсеттингенин демдеглээн. Объектилерниң көвей кезии ажыглалче кирген. Кара-Хаак, Тээли, Хадың, Булуң-Бажы суурларже кирер оруктарны, «Кызыл – Эрзин - Моол күрүне кызыгаары» регионалдыг оруктуң ийи участогун база «Тээли - Бай-Тал» муниципалдар аразының оруктуң ол-ла хире участоктарын ажыглалче киирген.
«Суг-Аксы – Ишкин» орук участогунда, Ак-Тал биле Ишкин суурларже кирер оруктарда, «Ак-Довурак – Абакан» автооруктуң 183 километринде Абакан хемни кежир көвүрүг тудуунда ажылдар доозулгалак. Оон аңгыда тудугжулар Кызылдың Ленин кудумчузунда 2 километр участокту доозуп турар, бо хүнде ында чүгле кудумчу чырыының чагыларын тургузары арткан.
Ажылдар чоруп турар участоктарның ниити узуну 9 хире километр. Тудугжулар планнаттынган бүгү хемчээлди чыл төнчүзүнге чедир доозарын аазаан. Ылаңгыя орукту шывар кол ажылдарны, орук кыдыын доозары, чырык чагыларын, орук демдектерин болгаш оруктуң өске-даа кезектерин тургузары арткан.
Ведомствонуң специалистериниң саналы-биле алырга, 2026 чылдың планнарын күүседип, регионалдыг болгаш муниципалдыг автомобиль оруктарының нормативтиг негелделерге дүгжүп турар үлүүн 54-ден 57 хуу чедир өстүрер. Сөөлгү беш чылда ниитизи-биле Тывада 700 ажыг километр оруктарны чогуур деңнелче киирген.