Главная
Пресс-служба
Медээлер

Тывага Салчак Калбакхорекович Токаның 125 харлаанын демдеглээр

19.11.2026 18:42

Декабрь 15-те көскү күрүне болгаш политиктиг ажылдакчы, Социалистиг Күш-ажылдың Маадыры, Тываның улустуң чогаалчызы Салчак Калбакхорекович Токаның төрүттүнгенинден бээр 125 чылын демдеглээр. Республика юбилейлиг ол хүнге чырыдыышкын, культура, байырлал хемчеглериниң программазын белеткээн.

Декабрь 1-ден 16-га чедир кол хемчеглер болуп эртер. Өөредилге албан черлеринге Салчак Токаның күрүне ажыл-чорудулгазынга болгаш чогаадыкчы өнчүзүнге тураскааткан парламент кичээлдери, темалыг класс шактары, литературлуг номчулгалар, викториналар, мөөрейлер болур. Школачылар болгаш студентилер ооң чогаалдарын, Тыва күрүнениң тургустунганының төөгүзүн, республиканы удуртуп чораан үезинде кол болуушкуннарны билип алырлар.

Библиотекалар, музейлер, эртем албан черлери номнар болгаш чуруктар делгелгелерин, темалыг экскурсияларны, төөгү-литературлуг ужуражылгаларны белеткээн. Алдан-Маадыр аттыг национал музейге Салчак Токаның чогаалдарынга тураскааткан «Тыва – бурунгу черниң аныяктары» деп экскурсия болур. А.С. Пушкин аттыг Национал библиотекага төөгү-литературлуг шак база «Араттың сөзү» деп чогаалга сайгарылга болуп эртер.

Декабрь 14-те республиканың Чазааның чанында Тываның гуманитарлыг эртемнер болгаш тускай социал-экономиктиг шинчилелдер институдунга «С.К.Токаның хүн демдеглелдери» деп номун таныштырып, юбилейге тураскааткан «төгерик столду» эрттирер.

Декабрьның 15-те байырлыг хемчеглер планнаттынган. Кызылда Салчак Токаның тураскаалынга боодал чечектерни салып, митингини эрттирип, юбилейге тураскааткан байырлыг чыыш болур. Национал театрга күрүне ажылдакчызының допчу-намдары кирген музей болгаш архив материалдарын делгээр.

Күрүне ажылдакчызының төрүттүнген чери — Каа-Хем кожууннуң Мерген суурга база сактыышкын хемчеглери эртер. Митингини эрттирип, тураскаалга боодал чечектерни салып, Тываның чогаалчылар эвилели хуралдап, Салчак Токаның төрүттүнгенинден бээр 125 чылынга тураскааткан тыва дылда чогаалдар мөөрейиниң түңнелдерин чарлаар.

Салчак Токаның ады-биле холбаалыг тураскаалдыг черлерниң, кудумчуларның, оран-саваларның чаагайжыдылгазынче онза кичээнгейни угландырар. Шак ындыг ажылды республиканың муниципалдыг тургузугларынга, ооң иштинде Кызыл биле Мерген суурларга чорудар.