Ноябрь 16-да Тываның Баштыңынга эрткен аппарат хуралынга национал төлевилелдерниң 2026 чылда күүселдезин чугаалашкан. Республиканың Чазааның Даргазының оралакчызының хүлээлгезин күүседип турар Эдуард Сандан баш бурунгаар түңнелдерни Владислав Ховалыгга илеткээн.
Республиканың Баштыңы регионнуң чурттакчыларынга национал төлевилелдерниң күүселдезиниң ужур-утказын демдеглээн: «Амыдыралга инфраструктура», «Өг-бүле», «Узун болгаш идепкейжи назын», «Аныяктар болгаш чаштар» дээш оон-даа өске төлевилелдерниң ужур-утказы дыка улуг. Ол сан-чурагайларның артында чурттакчы бүрүзүнге дээш кылган боттуг өскерлиишкиннер бар: кожууннарывыста септеттинген оруктар, чаартынган школар болгаш эмнелгелер, чаа инфраструктура объектилери-дир» - деп, Владислав Ховалыг бодунуң блогунда бижээн.
Тывада амыдыралдың кол угланыышкыннарын хаара туткан 10 национал төлевилелдерни боттандырып турарын сагындыраал. Оларның аразында «Үре-түңнелдиг болгаш чижилгелиг экономика», «Туризм болгаш аалчылар хүлээп алыр индустрия», «Экологтгу чаагай байдал», «Аъш-чемниң айыыл чок чоруунуң технологтуг хандырылгазы», «Амыдыралдың инфраструктуразы», «Узун болгаш идепкейлиг амыдырал», «Өг-бүле», «Аныяктар болгаш уруглар», «Күрүнениң медээлер экономиказы база са-чурагай өскерлиишкини», «Делегей кооперациязы база экспорт» бар.
Республика долу эвес 11 айның дургузунда национал төлевилелдер езугаар планнаттынган чүүлдерниң хөй кезиин күүсеткен. Планнаттынган 72 объектиниң 48-и долузу-биле доозулган. Тудуглар ниитизи-биле 87 хуу белен деп санаан. Ол дээрге чылда планнаттынган тудуг ажылдарның көвей кезии күүсеттингени ол.
Чижээ, Эрзин суурда культура бажыңы, Бора-Тайгада театр, Бай-Хаакта библиотека, Чадаанада музей, Ак-Талда уруглар сады, агроүлетпүр техникумунуң ниити чуртталга бажыңы, Ак-Довурак хоорайда школа, Аныяктар ордузунуң ийи каъды септелге соонда катап ажыттынган. «Амыдыралга инфраструктура» төлевилел шугуму-биле Кара-Хаак, Хадың, Тээли суурларже кирер оруктарны база «Тээли – Бай-Тал» база «Кызыл – Эрзин – Моол-биле күрүне кызыгаары» автооруктар участоктарын, 30 хөй-ниити шөлдерин чаагайжыткан.
24 объектиде тудуг ажылдары чоруп турар. Оларның сези дужаарынга барык белен. Ол дээрге беш орук участогу база көвүрүг, ол ышкаш Ак-Довурактың даг техникуму, Кызыл-Мажалыкта уруглар сады, Мугур-Аксында аныяктар төвү-дүр.
16 объектилер 90хире хуу белен деп үнелээн. Оларның аразында Самагалтай, Хову-Аксы, Бай-Хаак, Кызыл-Арыг суурларда, Ак-Довурак биле Шагаан-Арыг хоорайларда 6 кадык камгалал албан черлери; Сарыг-Сеп суурда база Ак-Довурак хоорайда ийи аныяктар төвү болгаш Эрги-Барлык суурда спортчу шөл база бар. Эдуард Санданның чугаазы-биле алырга, ол объектилерде байдал өскерлип база болур.
Чогуур яамылар ол угланыышкында чогуур хемчеглерни алган, ооң иштинде касса күүселдези, тудугнуң темпизин бедидер дээш оон-даа өске.
Республика Баштыңы декабрь 25-ке чедир национал төлевилелдер-биле ажылдың төнчү түңнелдерин үндүрер сорулганы салган.