Главная
Пресс-служба
Медээлер

Владислав Ховалыг Россияда Моолдуң онза болгаш бүрүн эргелиг элчини Дуламсүрэнгийн Даваа-биле ужурашкан

18.11.2026 08:34

Тываның Баштыңы Москвага чорааш, Россияда Моолдуң онза болгаш бүрүн эргелиг элчини Дуламсүрэнгийн Даваа-биле ужурашкан. Владислав Ховалыг Россия Федерациязында бодунуң чуртунуң дээди төлээзи кылдыр томуйлаттырганы-биле дипломатка байырын чедирип, ооң удуртулгазы-биле российжи-моол кады ажылдажылга чаа хөгжүлдени чедип алыр дээрзинге бүзүрелин илереткен. Ужуражылга найыралчы болгаш ажыл-агыйжы байдалга эрткен. Ийи тала Тыва-Моол кады ажылдажылгага хамаарышкан элээн хөй айтырыгларны сайгарып, онза кичээнгейни туризмни хөгжүдеринче угландырган.

«Тываның база Моолдуң кожа-хелбээ аймактарының төөгү-культурлуг болгаш шажын-чүдүлге төптерин харылзаштырып турар кызыгаарлар кежир оруктарны тургузарын сайгарып көрдүвүс. Медицина талазы-биле кады ажылдажылганың перспективаларын: специалистер солчулгазын база бистиң кожаларывыстың чедиишкинниг ажыглап турары чаңчылчаан буддийжи эмнээшкин аргаларын ажыглалче киирерин сайгарып чугаалаштывыс» - деп, Владислав Ховалыг ужуражылганы тодаргайы-биле бодунуң блогунда үлежип, гуманитарлыг ажыл-агыйдан эгелээш, экономикага чедир шупту адырларда Тыва-биле харылзааны быжыглаарынга Дуламсүрэнгийн Даваа белен дээрзин немээн.

2026 чылда Россия биле Моолдуң аразында дипломатчы харылзаалар тургустунганындан бээр 105 чыл болганын сагындыраал. Россия-Моол кызыгаарында Тыва эң узун хемчээлди ээлеп турар – ниитизи-биле 3500 километрниң 1300 километрин. Янзы-бүрү дөстерден алырга, Моолда 20 муң хире этниктиг тывалар чурттап турарын база демдеглезе чогуур. Республика моолдар-биле бизнес болгаш садыг-саарылга, өөредилге, культура, кадык камгалал, спорт талазы-биле шагда-ла хөй талалыг харылзааларны тудуп турар.

Россияның Даштыкы херектер яамызы кады ажылдажылга улам быжыглаттынганын барымдаалап, 2001 чылдың ноябрьда Кызылга Моолдуң чиңгине консул черин ажыдыптарга, харылзаалар улам идепкейжээн. Чижээ, республика амгы үеде Убсунур, Ховд, Завхан, Хөвсгөл, Архангай, Баян-Өлгий деп алды аймак-биле кады ажылдажылга дугайында дорт дугуржулгаларны чарган.