Главная
Пресс-служба
Медээлер

Тывада ТШО дайынчыларынга кышкы гуманитарлыг ачы-дуза чыылдазы эгелээн

16.11.2026 17:35

Тыва Республиканың Чазаа-биле кады Улусчу фронтунуң регион салбыры «Тиилелге дээш шупту чүве!» бүгү-российжи акцияның кышкы гуманитарлыг ачы-дуза чыылдазын эгелээн. Сооктар дүжүптерге, фронтуже чылыг хептер, техниктиг дериг-херекселдер болгаш аъш-чем чорудары чаңчыл апарган. Ноябрь 11-ден декабрь 17-ге чедир акция уламчылаар.

Мурнуку шугумче ачы-дузаны чылда беш катап чорудуп турар, ынчалза-даа кышкы акция оон кезээде онзагай. Бо соок үеде доңурган эът болгаш техниктиг дериг-херекселдерже кол кичээнгейни угландырып турар.

Чүъктүң баштайгы партиязынга чыылда эгелээн. Чижээ, Кызыл кожуун дайынчыларга хой эъдин, а «Авиаарга-арыг камгалалы» автомашинаны болгаш материал-технкитиг үнелиг чүүлдерни дамчыткан. Волонтерлар камгалал четкилерин аргып турар: «Деткимче» регионалдыг фонд Тываның Баштыңының даалгазы езугаар материалдарны садып алган.

Правобережная кудумчузунда 4 дугаар бажыңда, «Экопродукт» көдээ ажыл-агый рыногунда чаа доңурган эътти хүлээп турар. Дайынчылар ылаңгыя эътти четтикпейн манап турар, чүге дизе ол чүгле чем эвес, а төрээн чериниң болгаш аалының чылыы-дыр. Колдуунда хой, сарлык эъди болгаш тус черниң өске-даа эъдин дайынчыларже чорудар. Ам, кышкы үеде, дайынчыларга эът дыка херек дээрзин Улусчу фронт сагындырган.

Тудуг материалдары болгаш ажыл-агый дериг-херекселдеринден: өрээн демир четки, кылагар саазынныг изолон, дүрүг плёнкалар, ээрер кадаглар, кадаглар, балдылар, бензохүрээлер, ээрер херекселдер, хүүректер, ажыл кылыр хол-хаптар, газ плиталары, турисчи баллоннар, шөйер хендирлер, камгалал четкилер, дронга удур камгалал эгиннээштер, балыктаар четкилер, удуур хаптар, турисчи хевистер, машина септээр бөлүк дериг-херекселдер чугула херек.

Эмнер аймаандан: вируска удур эмнер, антибиотиктер, грибокка удур мазьтар, ижин-шөйүндү аарыгларынга болгаш суг дезинфекциялаар эмнер, витаминнер, шык салфеткалар болгаш аржыылдар, уруглар креми, өртеңге, хаварыктарга чаар эмнер, аллергия болгаш хораннаныышкындан эмнер, шарыыр материалдар, антисептиктер херек.

Техниктиг дериг-херекселден: квадрокоптерлер, дүне көөр приборлар, рациялар, спутник антенналары болгаш күштелдирер херекселдер, дрон детекторлары, электромотоциклдер, квадроциклдер, электрилиг чадаг-тергелер, генераторлар (дизель болгаш бензин инверторлары), чылыдар херекселдер, доктар чок чоруур машиналар чугула. Ол ышкаш чылыг хептер дайынчыларны өөртүр.

Чыылда пунктузунче даңзыда чүүлдерни, азы чыгдынган акшалар-биле херек техника болгаш дериг-херексел садып алырынга акша-төгерикти эккеп, акцияга киришпишаан, фронтуга үлүг-хууңар-биле дузалап болур силер. Ону pobeda.onf.ru/requiremen... сайт таварыштыр кылыры белен.

Бо хүннерде чыгдынган чүък ЛУР, ДУР, Запорожье, Херсон, Курск болгаш Белгород областарже чорудар. Республика Баштыңы шупту транспорттуң маршруду доктаавайн чоруур кылдыр, кывар-чаар чүүл-биле хандырарын дааскан.

Гуманитарлыг дуза чыылдазынга хамаарышкан шупту айтырыгларны Улусчу фронтунуң регионалдыг күүсекчи комитединден айтырып болур: Кызыл хоорай, Чульдум кудумчузу, 40А, кабинет. 21, тел.: 8(39422)2-10-50.