Тываның Чазаа хамаатыларның чиигелделиг бөлүүнге чер участоктарын бээриниң чурумун база чер сертификаттарын бээриниң чурумун чурумчуткан регионалдыг хоойлуларже өскерилгелерни киирген төлевилелди бадылаан. Документилер күрүне деткимчезиниң хемчеглерин алыр эргени калбартып, деткимче алыкчыларынга акша-биле төлевирни алыр арганы берген. Ук төлевилелди Тыва Республиканың Дээди Хуралынга сайгарып көөрүнче киирген.
Бир эвес ону бадылаптар болза, хууда бажың тударынга халас чер участогун алыр эргелиг Тываның чурттакчылары ол чер участогунуң орнунга акша төлевирин алыр аргалыг апаар. Алган акша-хөреңгини чер участогун садып алырынга азы чуртталга бажыңын садып (тудуп) алырынга, ооң иштинде ипотека чээлизиниң баштайгы төлевирин төлээринге база ажыглап болур.
Оон ыңай хоойлу төлевилели чер сертификады кылдыр социал төлевир алыр эргелиг хамаатылар бөлүүн калбарткан. Амгы үеде бо деткимче хемчег чүгле хөй ажы-төлдүг өг-бүлелер, үш болгаш оон хөй ажы-төл азырап алган өг-бүлелерге база инвалид уруглуг өг-бүлелерге хамааржырын сагындыраал. Хоойлу төлевилели халас чер алыр оочур даңзызында хамаатыларның чиигелделиг шупту бөлүктеринге ажылдап эгелээр.
Дыка хөй өг-бүлелерге чер участогу дээш оочур манап турбайн, чер сертификадының орнунга акша төлевирерин алыры эптиг болгаш дүрген арга болур. Бо деткимче хемчээ чурттакчыларга келир үеде планнарын соңгаарлатпайн, ол акша-хөреңгини таарымчалыг чурттаар оран-сава азы бодунуң черин садып алырынга ажыглаарын Тываның Чер болгаш өнчү хамаарылгаларының яамызы дыңнаткан.