Калмыкияның найысылалынга ажыттынган «Темада бол, ажыл-херекте бол» деп аныяктарның буддийжи форумунда Тываның делегация киржип турар. Россияның буддийжи ниитилелдериниң аныяк төлээлериниң чаңчылдарны сайзырадып, ниити культурлуг болгаш сүлде-сүзүк шөлүн быжыглаар дээн демнежиишкинин Тываның Баштыңы Владислав Ховалыг МАХ-та бодунуң каналында демдеглээн.
«Тываның делегациязында идепкейлиг аныяктар база Камба-Лама эргелелиниң төлээлери киржип турары дыка өөрүнчүг-дүр. Бистиң аныяктарывыс чурагай технологиялары база шынарлыг медиаконтентини тургузар адырда арга-дуржулгазы-биле үлежип, сүлде-сүзүктүң үнелиг чүүлдерни нептередир болгаш туризмни хөгжүдер талазы-биле чаа аргаларны тывар арганы алыр» - деп, республика баштыңы бодунуң медээзинге айыткан.
Элистада форум чүгле Калмыкия, Бурятия, Тыва дээн ышкаш үндезин буддийжи регионнардан аңгыда Алтайның төлээлерин база хаара тутканын демдеглээри чугула. Организаторларның дыңнатканы-биле алырга, киржикчилерниң аразында Россия Федерациязының өске-даа регионнарындан, ооң иштинде Москва, Краснодар болгаш Приморье крайлардан, Астрахань болгаш Москва областардан, Хакасиядан хөй аалчыларның келгени бүгү чуртта буддизмге болгаш ооң философиязынга сонуургал өзүп турарын көргүскен.
Форумнуң программазында лекциялар, дикуссиялар, мастер-класстар, шажын чүдүлге башкылары болгаш эксперттер-биле ужуражылгалар бар. Кол темаларның бирээзинге – амгы үениң чурагайлыг технологиялары, ооң иштинде кылымал угаан, буддизм дугайында медээлерни кадагалаарынга болгаш тарадырынга канчаар дузалаары, ол ышкаш аныяктарның амыдыралынга буддийжи үнелиг чүүлдерниң ролюн сайгарары кирген.
Аныяктарның «Темада бол, ажыл-херекте бол» деп буддийжи форуму чоннар болгаш шажыннар аразында эп-найыралды быжыглаарынга улуг үлүг-хуузун киирер, ол ышкаш Россияда буддийжи аныяктар шимчээшкининиң хөгжүлдезинге күштүг идигни бээр деп, организакчылар санап турар.
Форум бодунуң ажылын ноябрь 16-да доозар.