Республиканың Баштыңы Тываның кыдыг-кызыгаар Мөңгүн-Тайга кожууннуң Кызыл-Хая суурда чаа школа тудуун база катап хынаан. Владислав Ховалыг өөредилге чериниң тудуун бодунуң контролюнда тудуп турар. Кызыл-хаяжыларның республиканың удуртулгазынга кол дилээ апарган объектиге бо сезонда ийи катап четкен.
«Бедик даглыг черниң аргыжылгазында болгаш материалдар хандырылгазында бергедээшкиннер турза-даа, ажылдар долу дүргени-биле чоруп турар: даштыкы болгаш иштики ажылдарны дүргедедип, ажылдар калбаа-биле чоруп турар. Амгы үеде объектиде 100 хире кижи хаара туттунган. Бригадирлер болгаш ажылчыннар-биле чугаалаштым, материалдарның шынарын хынап, ажылдың темпизин көрдүм» - деп, Владислав Ховалыг бодунуң блогунга бижээн.
1963 чылда туткан амгы школаның орнунга 176 олуттуг, спорт залдыг амгы үениң үш каът оран-савазын тудуп турар. Школа көдээ уругларга бедик шынарлыг билиглерни бээр.
Владислав Ховалыг тус черниң чурттакчыларынга объектиниң ужур-дузазын демдеглээш, өөредилге албан чериниң ажыдыышкыны бүдүн суурнуң моон соңгааргы хөгжүлдезинге перспективаларны ажыдар онзагай болуушкун-дур деп айыткан.
Тываның Баштыңы чылдың июль, сентябрьда объектини хынап турда, тудугну хуусаазында доозары-биле ажылдың темпизин болгаш ажылчыннарның санын бедидерин тудуг черинге дааскан.
Бо удаада Владислав Ховалыг ажылды шынарның кудулатпайн, дүргедедирин айтып, а харыысалгалыг ведомство ажылдың хевир шынарын база хуусаазын хыналдага алыр даалганы берген.