Тывага «Ада-чурт дайынчыларының өг-бүлелер комитеди» автономнуг коммерцияга хамаарышпас организацияның тургустунганындан бээр чээрби чылынга тураскааткан «КСВО-нуң 4 чылы – 400 буянныг үүле» деп бүгү-российжи акцияны ноябрь 23-те эрттирер. Акция келир неделяда, ноябрь 16-дан 22-ге чедир болур.
«Комитеттиң тургустунган хүнүн чүгле байырлыг хемчеглер-биле эвес, а тускай шериг операциязының киржикчилеринге болгаш оларның өг-бүле кежигүннеринге практиктиг дузаны көргүзеринче угланган тодаргай буянныг ажыл-херектер-биле демдеглээри – акцияның кол идеязы» – деп, Тыва Республиканың Ада-чурт дайынчыларының өг-бүлелер комитединиң удуртукчузу Лада Натпит тайылбырлаан.
Өске регионнарда ышкаш, Тывада база акция 4 угланыышкынныг. Эрге-хоойлу дузазын көргүзерде чогуур яамыларның, ведомстволарның төлээлери, социал болгаш юридиктиг деткимче талазы-биле специалистерниң киржилгези-биле ТШО киржикчилеринге болгаш оларның өг-бүле кежигүннеринге үнүүшкүннүг юридиктиг консультацияларны эрттирер. Шериг албанныгларның болгаш оларның өг-бүлелериниң сагыш-сеткил байдалын деткииринче угланган сүлде-сүзүк болгаш сагыш-сеткил темалыг ужуражылгаланы, психологтар болгаш специалистер-биле чаңгыс кижиге болгаш бөлүктерге консультацияларны организастаар. Гуманитарлыг ажыл-херектерни болгаш кады боттандырар инициативаларны ботандырып, культура-массалыг хемчеглерни чорудар.
«Ажылдың бо хевири дээштиг деп санаар бис, чүге дизе ол дузага хереглелдиг кижилерже кичээнгей салдынар. Буян сеткил дээрге, чаңгыс катап болур акция эвес, а хүн бүрүнүң ажылы-дыр деп көргүзер бис» - деп, КСВО-нуң удуртукчузу Юлия Белехова чугаалаан.
Организация тургустунганындан бээр шериг албанныгларга болгаш оларның өг-бүлелеринге социал, эрге-хоойлу, психологтуг болгаш гуманитарлыг деткимче айтырыгларын шиитпирлээр дээш Россия Федерациязының шупту 89 субъектилеринден 18 муң ажыг волонтерларны каттыштырган, а активчилер 700 муң дилеглерни шиитпирлээринге дузалашкан.