Тываның орук ажыл-агыйының албан черлери хар чап, оруктар тайгактыг апарганындан, регионалдыг болгаш муниципалдар аразының оруктарынга орук шимчээшкининиң айыыл чок чоруун хандырар ажылдарны күштелдирген. Айыылдыг оруктарны участоктарын үстүрүп, дошка удур сай-довуракты чаштырып, патрульдаашкынны чорудуп турар. Арттар кырында база оон бадары берге черлерде техника аймаан ажылдаткан.
«Мындыг хүннерде орук озал-ондактарының айыылы улгады бээр. Чолаачыларны оожум чоруурун, аразының ыраан сагыырын, хенертен шимчээшкиннерден ойталаарын кыйгырып тур мен. Чадаг кижилер орукту чүгле аңгылаан черлерден кежери чугула. Орук шимчээшкининиң шупту киржикчилери кончуг кичээнгейлиг болгаш оваарымчалыг болурун диледим. Силерниң айыыл чок чорууңар - силерниң холуңарда дээрзин утпаңар» - деп, Тываның Баштыңы Владислав Ховалыг чурттакчыларга сагындырган.
«Тываавтодор» күрүне албан чериниң ноябрьның 12-де дыңнатканы болза, 17 орук-тудуг организацияларының 15-и регионалдыг болгаш муниципалдар аразының оруктарын ажаап-карактаарында хаара туттунган. Оруктарда 51 санныг техника болгаш 70 орукчулар ажылдап турар. Оларның аразында 18 комплекстиг орук машиналары, 10 МТЗ тракторлар, 7 автогрейдерлер болгаш өске-даа тускай техника бар.
Орукчулар хардан орукту үстүрүп, элезин-дус холумактыг довурактыг төп, орук кыдыын болгаш тротуарларны арыглап турар. Ыдлаңгыя, Кызыл – Сарыг-Сеп, Бояровка – Тоора-Хем, Абакан – Ак-Довурак болгаш өске-даа угланыышкыннарда орук участоктарында тайгакка удур чаштырар материалдарны үлээн. Арттар кырында дежурныйлаашкынны организастап, орукту конрольда алган.
Орук албан черлериниң дыңнатканы-биле, регионалдыг кол оруктарның байдалы эки. Ол ышкаш байдалды мониторингилеп, өскерлиишкиннер болганда дүрген хөделиринге белен. Чорук үнерде, агаар-бойдустуң байдалын кичээнгейге алырын, дүрген шаппайн, таваар чоруурун база кышкы дугуй чок автомашиналарны мунмазын сүмелеп турар.