Россияның Президентизи Владимир Путинниң шиитпири-биле «Маадырларның үези» деп федералдыг программаның үшкү чадазынче шилилге эгелээн. Тываның Баштыңы Владислав Ховалыг бодунуң Макс каналынга ооң дугайында дыңнадып, республиканың чурттакчыларының аразында программага киржир төлептиг кандидаттар бар деп, ол бүзүрелин илереткен.
«Владимир Владимировичиниң шиитпири – чурттуң келир үезинге инвестиция-дыр, чүге дизе дайынчы хөделиишкиннер үезинде алган башкарыкчы арга-дуржулганың үнези улуг. «Маадырларның үези» программа Ада-чуртунга бердингенин ажыл-херээ-биле бадыткаан кижилерге эжиктерни ажыдып турар» - деп, Владислав Ховалыг демдеглээн. Бирги бөлүктүң доозукчуларының хөй кезии эрге-чагырга органнарында ажылдап эгелээнин ол демдеглээн.
Республика Баштыңы чаа чыылданың онзагай талазын – тускай шериг опреациязының дээди эртем чок дайынчыларынга көрдүнгенин тайылбырлаан. Аңаа киржир дизе, Россияның хамаатызы, ниити ортумак, ортумак профессионал азы долу эвес дээди эртемниг болур, ол ышкаш дайынчы хөделиишкиннер үезинде көргүскен эрес-дидим болгаш маадырлыг чоруу херек.
2026 чылдың ноябрь 9-тан үнер чылдың январь 25-ке чедир билдириишкиннерни времягероев.рф деп сайтыга хүлээр. Кордакчылар анкетаны долдуруп, чогаадыгны бижип, шылгалданы дужаар. Дөрт чылдың орнунга үш чыл өөренир: чаа өөредилге технологияларын болгаш организастыг шиитпирлерни ажыглап эгелээни-биле хуусаазы ынчаар кызырылганын демдеглезе чогуур.
Баштайгы 1,5 чылда Президент академиязынга долу теоретиктиг программаны шиңгээдир, ооң соонда бот-өөредилгеже кирер. Программа быжыг академиктиг билиглерни, удуртуп-башкарылганың практиктиг аргаларын болгаш чогуур айтырыгларны ол-ла черинге шиитпирлээринге өөредилгени бээр. Доозукчулар хоорайларга, регионнарга, федералдыг ведомстволарга харыысалгалыг албан-дужаалдарны ээлеп, Төрээн чуртунуң чаагай чоруу дээш боттарының билиглерин болгаш арга-дуржулгазын ажыглаар.
Дээди эртем-билиглиг шериг албанныглар «Маадырларның үези» программага дараазында келир чыылдаларга киржип болурун организакчылар дыңнаткан.
Россияның Президентизи Владимир Путинниң даалгазы-биле «Маадырларның үези» деп программа 2024 чылдың март 1-де эгелээн. Ону Президентиниң академиязы болгаш «Россия – арга-дуржулга чурту» платформа ажылдадып турар. Бирги бөлүктүң шупту доозукчулары харыысалгалыг албан-дужаалдарда томуйлаттынган азы соңгуткан. Ийиги бөлүк өөредилгезин 2027 чылда доозар, ооң киржикчилериниң үштүң ийи кезии чаа албан-дужаалдарда ажылдап турарлар.
Чөөн-Хемчик кожуундан ТШО киржикчизи болгаш Россияның Маадыры Буян Куулар «Маадырларның үези» федералдыг программаның бирги бөлүүнүң доозукчуларының бирээзи дээрзин сагындыраал. 2025 чылдың декабрьда ол Тыва Республиканың аныяктар херектериниң сайыды кылдыр томуйлаткан, а сентябрьда Күрүне Думазының соңгулдаларынга деткимчени ап, Күрүне Думазының аныяктар политиказының талазы-биле комитеттиң составынче кирген.