Тывада республиканың күрүне хамааты албан-хаакчыларының аразында кол профессионал мөөрей чоруп турар. Эң-не тергиин специалистерни тодарадыр сорулгалыг мөөрей интеллектулдыг чадазынче кирген.
Мөөрейниң организатору — Тываның Баштыңының Администрациязының болгаш Тыва Республиканың Чазааның Аппарадының күрүне албаны, кадрлар курлавыры база эрге-хоойлу департаментизиниң дыңнатканы болза, бо чылын мөөрейге сонуургал бедик болган: республикадан 26 күрүне албан-хаакчылары киржир дээш билдириишкинни киирген.
Ноябрьның 6-да эрткен мөөрейниң ийиги чадазында бөлүк айтырыгларга харыылаан. Киржикчилер Россия Федерациязының Конституциязының, Тыва Республиканың Үндезин хоойлузунуң дүрүмнери, эрге-хоойлу билиглери база коррупцияга удур ажылдар билиглеринден аңгыда, күрүне албан-хаакчызы кижиниң этиказын база Россия биле Тываның төөгүзүн билиринге харыылаан.
Тестилерниң түңнелдеринге даянып, эң бедик түңнелдер көргүскен кордакчылар дараазында чадаже эрткен.
Мөөрейниң төнчү чадазынче киргеннер боттарының конкурс төлевилелдерин ажылдап кылгаш, таныштырарынга боттарын көргүзер. Үшкү чадада — эрге-чагырга органнарының ажыл-чорудулгазын сайзыраңгайжыдарынче база хамаатыларның амыдырал-чуртталгазының шынарын бедидеринче угланган автор төлевилелдерин камгалаар.
Конкурс төлевилелинче ооң кол утказының, сорулгаларының болгаш хемчеглериниң чугулазын база чаартылгалыг чүүлдерин бадыткаан комплекстиг эгелээшкинни таныштырып, чада аайы-биле боттандырар планының хуусааларын болгаш контрольдуг точкаларын, херек курлавырларның саң-хөө болгаш экономиктиг санаашкынын, үре-түңнелин санаар тодаргай күүселде көргүзүглерин (КПИ), тускай сорулгалыг бөлүктү тодарадырын болгаш төлевилелдиң ажык-чарлыын хандырарынга МИЧ болгаш социал четкилерге информастыг деткимче концепциязын киирери чугула.
Бо чадада чүгле профессионал билиглери эвес, а стратегтиг боданыышкыны, чогаадыкчы чоруу, сайзыралдың келир үезин баш бурунгаар көрүп билири база көстүп кээр.
Республика Баштыңының Администрациязындан, чогуур яамылар болгаш эксперт ниитилелинден төлээлер кирген жюри кежигүннери мөөрей киржикчилериниң документилерни ажылдап кылганындан аңгыда, а хөй-ниити мурнунга чугааланып билирин, айтырыгларга харыылаарын база бодунуң көрүжүн камгалап билирин үнелээр.
Мөөрейниң тиилекчизинге болгаш бирги, ийиги, үшкү черлер алган киржикчилерге дипломнарны болгаш акша шаңналдарын тыпсыр.