Бай-Тайга кожууннуң Кара-Хөл суурда мобильдиг харылзаа болгаш дүрген дамчыыр LTE Интернет ажылдап эгелээн. Тываның Чазааның «Билайн» компаниязы-биле кады ажылдажылгазының ачызында төлевилел боттанып, республиканың чурттакчыларынга амгы үениң сан-чурагайлыг ачы-дузаларын алырынга дең байдалды хандырган.
«Тываның географтыг туружу берге-даа болза, кижи бүрүзүнге амгы үениң технологияларын ажыглап болурун хандырар дээш эң-не ыраккы суурларны безин бедик шынарлыг харылзаа-биле хандырар дээн хемчеглерни доктаамал чорудуп турар бис» - деп, Тываның Баштыңы Владислав Ховалыг демдеглээн.
Эрткен чылын Кара-Хөлдүң чурттакчылары дорт шугум үезинде мобильдиг интернет дугайында дилегни республиканың Баштыңынче кииргенин сагындыраал. Республиканың чурагайлыг хөгжүлде яамызы Владислав Ховалыгның даалгазы-биле Тываның чурагай хөгжүлдезинде дески эвес чорукту эвээжедип, ыраккы чурттакчылыг черлерде харылзааны чоорту хөгжүдер планче ол көдээ суурну киирген.
Бөгүнде Кара-Хөлде 600 абонент четкиде коштунуп, хүнде интернет ажыглалы 650 ГБ ажа берген. Оон аңгыда, регионалдыг бюджеттен кандыг-даа саң-хөө салыышкыны чокка бо төлевилелди боттандырган.
Дүрген интернетти кииргени суур чурттакчыларының арга-шинээн калбарткан. Олар ам күрүне ачы-дузаларының порталы болгаш өске-даа электроннуг сервистер таварыштыр, муниципалдыг ачы-дузаларже ырактан кирип, ырактан өөренип, ажылдап, өг-бүлези-биле харылзааны тудуп, видеоконференцияларга киржип болур апарган.
Тываның чурттакчылары республиканың Баштыңынга бо удаада база айтырыгларны дорт салып болурун сагындыраал. Владислав Ховалыг-биле дорт дамчыдылга ноябрь 26-да, «Россия 24» телеканалга болгаш «ВКонтактыда» республика Баштыңының бодунуң арынынга болуп эртер. Чидиг айтырыгларны салып, дилеглериңерни болгаш санал-оналдарыңарны киирип болур силер. Чурттакчыларның айтырыглары онза кичээнгейни болгаш шиитпирлерни негеп турар ажылдарны илередиринге дузалаар.