Россияның Чырыдыышкын яамызының чанында чаа тургустунган Бүгү-российжи ада-ие комитединче Тываның регионалдыг ада-иелер комитединиң даргазы, «Чаштарның навигаторлары» төлевилелдиң регионалдыг координатору, «Билиг» российжи ниитилелдиң башкызы Сергей Лопсан кирген.
Комитеттиң бирги хуралы ноябрь 1-де «Орлёнок» бүгү-российжи уруглар төвүнге болган. Чурттуң шупту сес федералдыг округтарын төлээлээн 35 региондан 55 төлээлер чаа составче кирген. Оларның аразында регионалдыг ада-ие комитеттериниң 19 даргалары бар.
Сергей Лопсан ада-ие шимчээшкинин хөгжүдер болгаш өг-бүле биле школа харылзааларын быжыглаарынга хөй чылдарда ажылы-биле Тываны төлээлеп турар. Республиканың 156 школаларында болгаш колледжтерде ооң эгелээшкини-биле ада-иениң инициативаларының «Ромашка» төптери тургустунган. Төлевилел боттаныышкынының үезинде 45 муң ажыг ада-иелерни хаара туткан 10 муң ажыг хемчеглерни эрттирген.
Ол ышкаш республиканың Өөредилге яамызының деткимчези-биле чылдың-на эртип турар «Тыва Республиканың эң эки ада-ие комитеди» мөөрейниң тургузукчузу. Федералдыг болгаш регионнар аразының шөлдеринге Сергей Лопсан өөредилге организациялары биле ада-ие ниитилелиниң аразында кады ажылдажылганы хөгжүдер талазы-биле Тываның арга-дуржулгазын таныштырган. Ол 2026 чылда өг-бүлениң үндезин үнелиг чүүлдеринге тураскааткан регионнар аразының эртем-практиктиг конференциязын организастаан.
Киржикчилер чаартынган комитеттиң бирги хуралында удуртулгазын соңгуп, уруглар кижизидилгезиниң болгаш айыыл чок чоруунуң чугула айтырыгларын база 2026–2028 чылдарда ажыл планын сайгарган. «Артек» делегей чергелиг уруглар төвүнүң директору Константин Федоренко Бүгү-российжи ада-ие комитединиң даргазынга база катап соңгуткан.
Ада-иелер инициативаларын деткиири, школа, муниципалдыг болгаш регионалдыг деңнелдерге ада-иелер каттыжыышкыннарын сайзырадыры, кижизидилгениң чедиишкинниг арга-дуржулгаларын үлежири, өөредилге организацияларының амыдыралынга ада-иелерниң киржилгезин калбартыры – комитеттиң мурнады боттандырар ажылдарының санында. Уругларның сан-чурагайлыг айыыл чок чоруунуң база назы четпээннерни интернет таварыштыр хоойлуга удур ажыл-херектерже хаара тударындан камгалаар айтырыгларже киржикчилер онза кичээнгейни салган.