Тывада декабрь 1-ге чедир кижилерден өнчү-хөреңги үндүрүглеринге амгы төлевирлерни болгаш өрелер чыырының шалыпчы айын чарлаан. Өрелерни эвээжедип, республика бюджедин долдурары-биле хемчег эгелээн. Федералдыг үндүрүг албанының Тыва Республика талазы-биле эргелелиниң медеглээни болза, 2025 чылда 162679 кижиге 425 млн рубль түңүнге өнчү үндүрүглерин санаан. 2026 чылдың октябрь 1-ге чедир үндүрүг өрези 100,8 млн рубль четкен. Кызыл хоорай, Кызыл кожуун, Чөөн-Хемчик кожуун үндүрүглерде эң хөй өрелерлиг.
Федералдыг үндүрүг албанының Тыва Республикада эргелели шалыпчы айда ажылдаар ажылчын бөлүктерни муниципалдыг тургузуглар чагыргаларында тургузуп, чыглы берген өрелер болгаш ону төлээриниң эптиг аргаларын чурттакчыларга дыңнадыры-биле өрегелерни эргип кезиир харыысалгалыг кижилерни томуйлаан.
Көдээ черлерде чурттап турар үндүрүг төлекчилеринге эптиг болзун дээш, федералдыг үндүрүг албаны бүдүн ай дургузунда үндүрүг төлекчилериниң үндүрүглерин шүүштүрүп, ол-ла черинге төлептиг болур үнүүшкүннүг ажылды база организастаар.
Ол ышкаш шалыпчы айның дургузунда өрелиг чолаачылардан үндүрүг өрезин чыыры-биле ОШАЧКИ-ниң стационар постуларынга ведомстволар аразының рейдилерин ажылдадыр.
Бо хемчеглерниң түңнелдеринге даянып, муниципалдыг тургузугларның болгаш сумуларның өнчү-хөреңги үндүрүглеринге амгы төлевирлерни болгаш өрелерни чыгганынга даянган неделя санында рейтингини үндүрер. Шалыпчы айның түңнелдерин декабрьның баштайгы он хонуунда үндүрер, ооң көргүзүглериниң дугайында отчетту регионнуң чазаанче киирер.
Тываның федералдыг үндүрүг албанының эргелели үндүрүглер төлевириниң хуусаазы 2026 чылдың декабрь 1-де доостурун сагындырган.
Кызыл хоорайның Московская кудумчузунда 8 дугаар бажыңда, Федералдыг үндүрүг албанының Тыва Республикада эргелелиниң операциялар залы үндүрүг төлекчилеринге эптиг болзун дээш, бүдүн ноябрьда вторникте болгаш четвергте кежээкиниң 20:00 шакка чедир ажылдаар. Оон аңгыда, операциялар залы субботаларда 9:00 шактан 17:00 шакка чсонну хүлээп алыр.
«Үндүрүг төлекчизи кижиниң хууда кабинеди» азы «Күрүне ачы-дузалары» сервис таварыштыр өнчү-хөреңги үндүрүглерин болгаш хууда орулга үндүрүглерин комиссия чокка кандыг-даа үеде төлеп болур.Хамаатылар үндүрүг төлевирлеринге хамаарышкан бүгү-ле айтырыгларын Россияның Федералдыг үндүрүг албанының Чаңгыс аай контакт-төвүнүң 8-800-222-22-22 дугаарлыг телефондан айтырып база болур.