Эрзин кожууннуң алдарлыг чурттакчызы, Тываның Улустуң чурукчузу, Тываның АССР-ниң культуразының алдарлыг ажылдакчызы, даш-чонукчузу, чогаалчы болгаш композитор, И.E. Репин аттыг күрүне шаңналының лауреады Бригад Санчаевич Дүпчур аттыг Бай-Даг суурнуң культура бажыңы «Өг-бүле» национал төлевилел күүселдези-биле бүрүн септеттинген соонда катап база ажыттынган.
1983 чылда туттунган тудугнуң септелге ажылдары 2025 чылдан шилчип келген объект кылдыр эгелээн болгаш, бо чылын чедиишкинниг доозулган. «Суугу» КХН тудуг организациязы төөгүлүг оран-саваның бодун кадагалап, албан черин амгы үениң хереглелинге таарыштыр кылган.
Федералдыг субсидияның ачызында албан чери чаа сцена дериг-херекселдерин: сандайлар, амгы үениң үн болгаш чырык дериг-херекселдери, сцена шимелдезин база алган. Амгы үеде Бай-Даг культура бажыңы чогаадыкчы ажылдың, концерттер, бөлгүмнер болгаш харылзааның долу четчелеттинген шөлү апарган.
Тываның Баштыңы Владислав Ховалыг Бай-Дагның чурттакчыларынга улуг ужур-уткалыг объектини ажытканы-биле байырны чедиргеш, Демир-оол Кежиктиг уругларның уран чүүл школазының филиалы — Эрзинде билдингир урукчу болгаш башкы, ТШО зоназынга мөчээн дайынчы Вячеслав Дупчур аттыг ус-шеверлел болгаш уран-каасталга уран чүүлүнүң чурулга салбыры салбырын ажытканы чаартынган шөлдүң кол кезээ болган.
Вячеслав Сереновичиниң төрээн суурунда хөй санныг өөреникчилерни арттырып каан, база ооң ады ажылдап турганы Культура бажыңы-биле кезээ мөңгеде харылзаалыг.
«Бо чүүл сактыышкынны болгаш салгалдар аразында харылзааны кадагалап арттырып турар. Суурнуң төвү турган болгаш болуп арткан Культура бажыңы ам оон-даа чараш, аянныг апарган. Тываның культура инфраструктуразынга чаартылгаларны ам-даа уламчылаар бис. Бай-Дагның чурттакчыларынга ол болуушкун-биле байыр чедирип тур мен!» – деп, Тываның Баштыңы бижээн.
Клубтуң капитал септелгезиниң үезинде шуут катап тудупканы онзагай: спортзалын тудуштур тудуп үндүрүпкен. Бай-Дагда культура бажыңының чаартылгазы – Тываның культура инфраструктуразын чаартыр системалыг ажылдың көскү чижээ болган. 2025 чылдан шилчип келген ийи объект: Бай-Дагда Көдээ культура бажыңынга база Сүт-Хөл кожууннуң Бора-Тайгада улусчу театрга улуг септелге ажылдарын «Өг-бүле» национал төлевилел боттандырылгазы-биле эгелээн. Бо арга республиканың аңгы-аңгы кожууннарында турум культура төптерин ажылдадып, чурттакчы чонга шынарлыг культура ачы-дузаларын алыр дең эргени берип турар.