Ноябрьның 7-де, Тываның найысылалынга Тываның Баштыңының Кубогу дээш сумо маргылдаазы эгелээн. «Херел» спорт залынга болуп эртер спортчу хемчег республиканың аңгы-аңгы булуңнарындан шыырак аныяк мөгелерни – 17 хар четпээн оолдар, уругларны татамиге чыып, боттарының деңзилеринге эң күштүглерни тодарадыр.
Маргылдаа элээн каш чугула айтырыгларны шиитпирлээринче угланган: регионга сумону хөгжүдүп нептередир, аныяктар ортузунга кадык амыдыралды суртаалдаар, спортчуларның спортчу арга-мергежилиниң деңнелин бедидер. Оон аңгыда маргылдаа Россия чемпионадынга киржир республиканың чыынды командазынче мөгелерни шилип, четчелээр чада болур.
Элээдилерниң III разрядындан эвээш эвээш эвес белеткелдиг спортчулар аңаа киржир.
Маргылдаа дараазында деңзилерге болуп эртер:
- Кыс уруглар (2011–2012 чылдарда төрүттүнген): 40 кг, 50 кг, 60 кг, 70 кг, +70 кг.
- Оолдар (2011–2012 чылдарда төрүттүнген): 50 кг, 55 кг, 65 кг, 75 кг, 85 кг, 95 кг, +95 кг.
Хүн чуруму:
Ноябрь 7 (келир база белеткенир хүн):
- 13:00–16:00 — киржикчилерни бүрүткээри;
- 16:00–18:00 — килденири база эмчи шинчилгези.
Ноябрь 8 (салыглар хүнү):
- 14:00–14:30 — маргылдааның байырлыг ажыдыышкыны;
- 14:30–16:30 — чартык финал оюннар;
- 16:30–18:00 — сөөлгү салыглар;
- 18:30 — тиилекчилерни база шаңналже киргеннерни шаңнап-мактаары.
Тыва Республиканың чыынды командаларының спортчу белеткел төвү база Тыва Республиканың сумо федерациязы-биле кады маргылдааның белеткелин болгаш эрттирериниң ниити удуртулгазын чоруткан. Мөөрейни арга-дуржулгалыг специалистер шииткели-биле эрттирер. Кол шииткекчизи — Эртине Допуй-оол, кол секретары — Белек Иргит.
Деңзи аайы-биле Тыва Республиканың Баштыңының Кубогунуң тиилекчилеринге болгаш шаңналдыг черлерниң эдилекчилеринге медальдарны, хүндүлел бижиктерни болгаш акша сертификаттарын тыпсыр.
Аныяк мөгелерниң хүрежин көөрүнче республиканың чурттакчыларын чалап тур бис. Шак мындыг маргылдаалар чүгле көрүштүг мөөрей эвес, а Россияның болгаш делегей чергелиг маргылдааларга Тываны улам алдаржыдар чаа салгалдың чемпионнарын өстүреринге чугула базымнар болур.